विराटनगर,जेठ २४
जग्गा खरिद मा भ्रष्टाचारमा मुछिएर मन्त्रालय तानिएका नेपाल आयल निगमका कार्यकारी निर्देशक गोपाल खड्काले राजीनामा दिएका छन् ।
उनले बिहीबार उद्योग वाणिज्य तथा आपूर्ति मन्त्रालय सिंहदरबारमा पत्रकार सम्मेलन गर्दै आजकै मितिबाट लागु हुने गरी राजीनामा दिएको बताए ।
राम्रो नियतले नै पेट्रोलियम पदार्थको भण्डारण क्षमता बढाउन पहल गरेको तर देशीरविदेशी शक्ति र अन्य समूहले आफु विरुद्ध खनिएर बद्नाम गरेको उनले गुनासो गरे ।
आफुलाई मन्त्रालय तानेर जिम्मेवारीबिहीन बनाएकोले पदमा बसिरहन उपयुक्त नभएकोले राजिनामा दिएको उनको भनाई छ ।
उनले भने, मलाई मन्त्रिपरिषद्ले हटाए पनि सर्वोच्चले मेरो लागि स्टे अडर जारी गरेको थियाे। र, म हाजिर भएँ। हाजिर भएपछि पनि मलाई कुनै जिम्मेवारी दिइएन। मेरो मनोबल गिराउने काम भयो । त्यसैले मैले राजीनामा दिएँ ।
आयल निगममा हुँदा व्यापक अनियमितता गरेको आरोप लागेका खड्कालाई लागेको थियो।
उनलाई इन्धन भण्डारणको लागि जग्गा खरिद गर्दा अनियमितताको आरोप लागेकाले निगममै राख्दा निगमको हित विपरित कार्य गर्न सक्ने भन्दै आपूर्ति मन्त्रालयले मन्त्रालयमा हाजिर गराउने निर्णय शेरबहादुर देउवा नेतृत्वको सरकारले गरेको थियो।
उनको अझै ६ महिनाको कार्यकाल बाँकी नै थियो ।
अब कार्यकारी निर्देशक खुल्ला प्रतिस्पर्धाबाट
उद्योग, वाणिज्य तथा आपुर्तिमन्त्री मात्रिका यादवले आयल निगमका तत्कालिन कार्यकारी निर्देशक गोपाल खड्काले राजीनामा दिएकोमा धन्यवाद दिएका छन् ।
मन्त्रालयमा बिहीबार आयोजित पत्रकार सम्मेलनमा मन्त्री यादबले मन्त्रालयलाई काम गर्न सहज वातावरण बनाइदिएकोमा धन्यवाद ब्यक्त गरेका छन् ।
मन्त्री यादवले भने, ‘मन्त्रालयलाई काम गर्न सहज वातावरण बनाइदिनुभयो, यसका लागि उहाँलाई धन्यवाद छ ।’
उनले निगममा अब नयाँ नियुक्ति गर्दा प्रतिस्पर्धाका आधारमा गरिने भन्दै निगमलाई सुधारेर लैजाने दावी गरे । मन्त्री यादवले नेपाल आयल निगममा नयाँ नियुक्तिका लागि छलफल थाल्ने पनि बताए ।
