८ बैशाख, काठमाडौ । प्रस्तावित युरोपेली सुपर लिग (ईएसएल)बाट इंग्लिस प्रिमियर लिगका क्लबहरुले आफ्नो नाम फिर्ता लिएका छन् ।
उक्त सुपर लिगको घोषणा भएसँगै विश्वभर फुटबल समर्थकहरुको चौतर्फी विरोध बढेपछि इंग्लिस क्लब म्यानचेस्टर सिटी, चेल्सी, म्यानचेस्टर युनाइटेड, आर्सनल, लिभरपुल र टोट्टेनह्यामले नाम फिर्ता लिएका हुन् ।
सुरुमा म्यानचेस्टर सिटीले मंगलबार विज्ञप्ति जारी गर्दै सुपर लिगमा सहभागिता नजनाउने बताएको थियो । त्यसपछि चेल्सी लगायत अन्य क्लबले पनि नाम फिर्ता लिएको हो । क्लबहरुले समर्थकसँग माफीसमेत मागेको छ । यूईएफए अध्यक्ष एलेक्जेन्डर सेफेरिनले यस कदमको स्वागत गरेका छन् ।
इंलिस क्लबहरुको बहिगर्मनपछि अब सुपर लिगमा ६ वटा क्लबमात्रै बाँकी छन् । जसमा स्पेनबाट रियल म्याड्रिड, एट्लेटिको म्याड्रिड र बार्सिलोना रहेका छन् भने इटलीबाट एसी मिलान, इन्टर मिलान र युभेन्टस् छन् ।
आइतबार रियलका अध्यक्षसमेत रहेका फ्लोरेन्टिनो पेरेजको अध्यक्षतामा गठित ईएसएलमा २० टिमले प्रतिस्पर्धा गर्ने बताइएको थियो । जसमा १५ संस्थाापन क्लब र ५ आगन्तुक क्लब रहने छन् । तर, फिफा र युईएफएले भने यसलाई समानान्तर प्रतियोगिता भनेको थियो ।
ईएसएलमा खेल्ने खेलाडीलाई प्रतिबन्ध लगाउने चेतावनीसमेत दिएको थियो ।
