१ जेठ, काठमाडौं ।
सरकारले कोरोना महामारीको बीचमा पनि विकास निर्माण तीव्र भइरहेको दाबी गरे पनि पुँजीगत खर्च भने अत्यन्तै कम देखिएको छ ।
प्रधानमन्त्री केपी शर्मा ओलीले अहिले जस्तो विकास इतिहासमा नभएको जिकिर गर्दै आउनुभएको छ तर चालू आर्थिक वर्षको १० महिनामा जम्मा साढे ३५ प्रतिशत मात्रै विकास बजेट खर्च भएको छ ।
सरकारी आय व्ययको लेखाजोखा राख्ने महालेखा नियन्त्रकको कार्यालयका अनुसार बैशाख मसान्तसम्म जम्मा १ खर्ब २५ अर्ब ७७ करोड रुपैयाँ अर्थात ३५ दशमलव ६४ प्रतिशत मात्रै विकास बजेट खर्च भएको छ ।
यो आर्थिक वर्षको लागि तीन खर्ब ५२ अर्ब रुपैयाँ विकास बजेट छुट्याएको सरकारले अर्धवार्षिक समिक्षामार्फत दुई खर्ब ८३ अर्बमा झारेको थियो । १० महिनामा जम्मा ३५ प्रतिशत मात्रै विकास खर्च हुनुले नेपालको पूर्वाधार निर्माण सुस्त रहेको प्रमाणित गरेको अर्थविद्हरुको टिप्पणी छ ।
यस्तै चालू तर्फ ६ खर्ब ३० अर्ब रुपैयाँ अर्थात ६६ दशमलव ३९ प्रतिशत खर्च भएको छ । यो आर्थिक वर्षको लागि सरकारले नौ खर्ब ४८ अर्ब रुपैयाँ चालू खर्च विनियोजन गरेकोमा अर्धवार्षिक समिक्षामार्फत नौ खर्ब १४ अर्बमा झारेको थियो । यस्तै वित्तीय व्यवस्थातर्फ ६८ अर्ब ७२ करोड रुपैयाँ अर्थात ३९ दशमलव ७७ प्रतिशत खर्च भएको छ ।
समग्रमा १० महिनामा ५५ दशमलव ९१ प्रतिशत बजेट खर्च भएको छ । यस्तै यो वर्ष १० खर्ब ७४ अर्ब रुपैयाँ राजश्व संकलनको लक्ष्य राखिएकोमा १० महिनामा सात खर्ब ६१ अर्ब रुपैयाँ अर्थात ७५ दशमलव २२ प्रतिशत संकलन भएको छ ।
