१३ साउन, काठमाडौं ।
संसदीय समितिले कक्षा १२ का विद्यार्थीलाई परीक्षाअघि खोप दिने व्यवस्था गर्न सरकारलाई निर्देशन दिएको छ । बुधबार प्रतिनिधिसभाको शिक्षा तथा स्वास्थ्य समितिले सो निर्देशन दिएको हो ।
समितिले कोरोना संक्रमणका कारण परीक्षामा सहभागी हुन नसक्ने विद्यार्थीलाई दोस्रो चरणमा परीक्षा दिन पाउने व्यवस्था मिलाउन पनि निर्देशन दिएको छ । परीक्षाअघि नै परीक्षणको व्यवस्था गर्न र संक्रमण देखिएर सहभागी हुन नसक्ने अवस्था भएमा दोस्रो चरणमा परीक्षा दिने व्यवस्था गर्न समितिले निर्देशन दिएको समितिकी सभापति जयपुरी घर्तीले बताइन् ।
उनले भनिन्,‘४ लाख विद्यार्थी छन् । उनीहरुलाई परीक्षा दिनुअघि खोप दिन सकिन्छ भने पहल गर्न सरकारलाई समितिको सुझाव छ । साउन ३१ गतेबाट परीक्षा हुने भएकाले अझै समय छ ।’
कक्षा १२ को परीक्षालगायतका विभिन्न विषयमा संसदीय समितिले बुधबार शिक्षा, विज्ञान तथा प्रविधि मन्त्रालयका अधिकारीसँग छलफल गरेको थियो । कक्षा १२ को परीक्षा साउन ३१ गते शुरु हुँदैछ । कोरोना महामारीका कारण यसपटक होम सेन्टरमा नै परीक्षा लिइने व्यवस्था गरिएको छ ।
