१३ साउन, काठमाडौं ।
जनता समाजवादी पार्टी (जसपा)को आधिकारिकता विवाद समाधानका लागि निर्वाचन आयोगले गरेको सनाखतमा तटस्थ बसेका रेशम चौधरी जसपा आधिकारिकको पक्षमा खुलेका छन् । जसपाका प्रचार विभाग प्रमुख डम्बर खतिवडाले चौधरी आफूहरुको पक्षमा रहेको खुलासा गरेका हुन् ।
डिल्लीबजार कारागारमा रहेका चौधरीले केन्द्रीय कार्यकारिणी बैठक चलिरहेको बेला फोनमार्फत आफू जसपाको आधिकारिक पक्षमा रहेको बताएका खतिवडाले सामाजिक सञ्जालमार्फत जानकारी दिएका छन् ।
‘माननीय रेशम चौधरीले फोनवार्तामार्फत व्यक्त गर्नु भएको इच्छा र तुल्सीलाल स्मृति भवनमा जारी जसपा बैठकको अनुमोदन मुताबिक चौधरी जसपा आधिकारिक पार्टीमा र पार्टी केन्द्रीय कार्यकारिणी समिति सदस्य कायमै रहनु भएको प्रष्ट गर्न चाहन्छु,’ खतिवडाले फेसबुकमा लेखेका छन् ।
जसपा आधिकारिता विवादमा निर्वाचन आयोगले बहुमत पक्ष छुट्याउन ५१ सदस्यीय केन्द्रीय कार्यकारिणी समितिका सदस्यलाई सोमबार बोलाएको थियो । प्रहरीको गाडीमा राखेर निर्वाचन आयोग लगिएका चौधरीले आफूले जसपा विवादमा दुवै पक्षमा मत नदिई तटस्थ बसेको जिकिर गरेका थिए । चौधरी कैलालीको टीकापुर घटनामा दोषी ठहर भइ डिल्लीबजार कारागारमा सजाय भुक्तान गरिरहेका छन् । र जसपाको नयाँ संरचना अनुसार चौधरी ३५ औं सदस्यको रुपमा केन्द्रीय कार्यकारिणी समितिमा सदस्य छन् ।
