१९ साउन, काठमाडौं ।
नेपाल विद्युत् प्राधिकरणका कार्यकारी निर्देशक हितेन्द्रदेव शाक्यले राजीनामा दिन अस्वीकार गरेका छन् ।
मंगलबार ऊर्जा, जलस्रोत तथा सिँचाइमन्त्री पम्फा भुसालले कार्यकारी निर्देशक शाक्यलाई राजीनामा दिन आग्रह गरेकी थिइन्। तर, शाक्यले तत्काल राजीनामा नदिने र सरकारले हटाए अदालतमा जाने बताएको स्रोतले जानकारी दिएको छ ।
प्रधानमन्त्री शेरबहादुर देउवाले मन्त्री भुसाललाई शाक्यलाई राजीनामा दिन लगाएर कुलमान घिसिङलाई नियुक्तीको प्रकृया अघि बढाउन आग्ह गरेका थिए ।
उनले आफू चार वर्षका लागि नियुक्त भएको भन्दै राजीनामा नदिन अडान लिएको स्रोतको भनाइ छ। केपी शर्मा ओली नेतृत्वको निवर्तमान सरकारबाट नियुक्ति पाएका शाक्यलाई कार्यसम्पादन राम्रो नभएको भन्दै कार्यकारी निर्देशकबाट हटाउने तयारी गरिएको हो। उनले राजीनामा नदिए स्पष्टीकरणमार्फत् हटाउने तयारी रहेको छ ।
