२३ साउन, काठमाडौं।
गृहमन्त्री बालकृष्ण खाँडले विमानस्थल र नेपाल प्रवेश गर्ने मुख्य सीमा नाकाहरुमा कोरोनाको परीक्षण र खोप लगाउने व्यवस्था गर्न स्वास्थ्य मन्त्रालयलका अधिकारीहरुलाई निर्देशन दिएका छन् ।
गृहमन्त्रालयमा कोभिड १९ रोकथाम तथा नियन्त्रण सम्बन्धिको छलफलमा मन्त्री खाँडले परीक्षण बढाउन र खोप अभियानलाई तीव्रता दिन स्वास्थ्य मन्त्रालयलाई आग्रह गरेका हुन्। नागरिकलाई कोभिडको महामारीलाई बचाउनु सरकारको पहिलो प्राथामिकता रहेकोले तेस्रो लहरको प्रभाव पर्न नदिने गरी तयारी थाल्न उपलब्ध खोप, परीक्षण सामग्रीको व्यवस्थापन र आपूर्तिमा विलम्ब गर्न नहुने गृहमन्त्री खाँडको आग्रह छ।
यसैबीच स्वास्थ्य तथा जनसंख्या मन्त्रालयले भौतिक उपस्थिमा हुने सबै परीक्षा स्थगन गर्न कोभिड १९ संकट व्यवस्थापन केन्द्रसमक्ष सिफारिस गरेको छ। स्वास्थ्य राज्यमन्त्री उमेश श्रेष्ठले यथास्थितिमा परीक्षा सञ्चालन गर्न नसकिने अवस्था रहेकाले मन्त्रालयले निकट भविष्यमा हुन लागेका सबै परीक्षा स्थगन गर्न सीसीएमसी समक्ष सिफारिस गरेको जानकारी दिएका छन् ।
