२५ साउन, काठमाडौँ ।
दक्षिण एसियाली फुटबलको सर्वोच्च प्रतियोगिता साफ च्याम्पियनसिप माल्दिभ्समा आयोजना हुने पक्का भएको छ । दक्षिण एसियाली फुटबल महासंघ (साफ) को सोमबार बसेको बैठकले साफ च्याम्पियनसिप माल्दिभ्समा आयोजना गर्ने निर्णय गरेको हो ।
प्रतियोगिता अक्टोबर १ देखि १३ सम्म माल्दिभ्समा आयोजना गर्ने निर्णय भएको एन्फा महासचिव इन्द्रमान तुलाधरले जानकारी दिए । स्वास्थ्य मापदण्ड मध्यनजर गर्दै तालिकामा केहि फेरबदल हुन सक्ने उनले बताए ।
साफमा ५ राष्ट्र सहभागी हुने भनिएपनि भुटानले समेत सहभागी हुने सम्भावना बढेको छ । भुटान सरकारले साफमा सहभागी हुन सकारात्मक छलफल गरेकाले ३ दिनमा भुटानले यकिन निर्णय दिने भएको छ । पाकिस्तान भने सहभागी हुने छैन ।
बंगलादेशमा भएको गत संस्करणको साफ च्याम्पियनसिपको उपाधि माल्दिभ्सले जितेको थियो । नेपाल भने सेमिफाइनलमा माल्दिभ्ससँग पराजित भएको थियो । नेपाल हालसम्म साफ च्याम्पियनसिपको फाइनल पुग्न सकेको छैन ।
