५ भदौ, काठमाडौं ।
नेकपा (एमाले)का नेता महेश बस्नेतले एमालेको भातृ संगठन राष्ट्रिय युवा संघमा आबद्ध भयो भने पाँच लाख साथी थपिने बताएका छन्। उनले सो संगठन लोकप्रिय रहेको भन्दै त्यसमा आबद्ध भएपछि सामाजिक काम गरौं गरौं लाग्ने बताए।
शनिबार युवा संघद्वारा आयोजित वमेन सेल्फ डिफेन्स ट्रेनिङु कार्यक्रममा बोल्दै उनले भने ‘तपाईंले फेसबुकमा कुनै स्टाटस हाल्नुभयो भने दश बीस लाइक होइन, दुई चार सय लाइक हाइहाल्छ। किनभने तपाईं युवासंघको सदस्य हुनुभयो। टिकटक बनाउनुभयो भने पहिलाको जस्तो दुई तीन सय भ्युअर्स होइन, अब चालिस पचास हजार भ्युअर्स भइहाल्छ। तपाईं त्यति लोकप्रिय संगठनमा आबद्ध हुनुभयो ।’
उनले क्षमतालाई उजागर गर्नका निम्ति तपाईंलाई सहयोग, साथ र संगठन चाहिने भन्दै राष्ट्रिय युवा संघ उपयुक्त भएको बताए। सम्बोधनको क्रममा बस्नेतले माधवकुमार नेपालको पनि आलोचना गरे। उनले भने ‘कसैलाई नेता बन्न रहर लाग्यो भनेर नयाँ पार्टी खोल्दैमा नेता भइँदैन। नयाँ पार्टी खोलेर प्रचण्ड र शेरबहादुर देउवाको टाँगमुनि एमाले छिराउने, हिजो राजालाई दाम चढाएर पार्टी बुझाएका माधव नेपालले आज प्रचण्डलाई दाम चढाएर यो पार्टी बुझाउन खोज्दैछन् ।’
