६ भदौ, काठमाडौं ।
देशभरका महानगरपालिकामध्ये सबैभन्दा बढी काठमाडौँ महानगरको बेरुजु देखिएको छ ।
महालेखा परीक्षकको कार्यालयले शुक्रबार सार्वजनिक गरेको प्रतिवेदनअनुसार गत आर्थिक वर्ष काठमाडौँ महानगरपालिको झण्डै २ अर्ब रकम बेरुजु देखिएको छ ।
महालेखाले लेखापरीक्षण गरेको १६ अर्ब ३६ करोड रकमबाट ११.८६ प्रतिशत बेरुजु देखिएको हो । जुन, जम्मा लेखापरीक्षण रकमको १ अर्ब ९४ करोड १२ लाख हो ।
काठमाडौँपछि वीरगञ्ज महानगरपालिकाको बेरुजु धेरै देखिएको छ । ९ अर्ब १६ करोड लेखा परीक्षण रकममध्ये ७५ करोड ६७ लाख रकम बेरुजु देखिएको हो । जुन ८.२६ प्रतिशत रकम हो ।
त्यस्तै वीरगञ्जपछि पोखरा महानगरपालिकाको बेरुजु रकम धेरै रहेको छ ।
पोखरा महानगरको ९ अर्ब ५१ करोड २५ लाख लेखा परीक्षण रकममध्ये ७० करोड ५७ लाख रकम बेरुजु देखिएको छ । यो रकम लेखा परीक्षण गरिएको रकमको ७.४२ प्रतिशत हो ।
त्यससँगै ललितपुर महानगरपालिको बेरुजु पनि बढेको महालेखाको प्रतिवेदनमा उल्लेख छ ।
९ अर्ब ३१ करोड ६४ लाख लेखा परीक्षण रकमबाट ६७ करोड ३० लाख रकम बेरुजु देखिएको छ । जुन जम्मा लेखा परीक्षण गरिएको रकमको ७.२२ प्रतिशत हो ।
त्यस्तै विराटनगर महानगरको बेरुजु ३.४१ प्रतिशत रहेको छ भने भरतपुर महानगरको बेरुजु २.०२ प्रतिशत रहेको छ ।
हालसम्म ६ महानगरपालिको ६२ अर्ब ८७ करोड ५६ लाख लेखा परीक्षण रकममध्ये यसवर्षको बेरुजु ४ अर्ब ६३ करोड ८४ लाख रुपैयाँ रहेको छ ।
त्यस्तै हालसम्म ६ वटै महानगरको १२ अर्ब २९ करोड ४१ लाख रुपैयाँ रहेको छ ।
