७ भदौ, काठमाडौं ।
अफगानिस्तानमा जारी उद्धार अभियानमा अब व्यावसायिक उडान गरिने अमेरिकाले घोषणा गरेको छ ।
उद्धार अभियानलाई थप तीव्र पार्नका लागि व्यावसायिक जहाजहरु पनि प्रयोग गरिने अमेरिकी रक्षा मन्त्रालय पेन्टागनले जनाएको छ ।
रक्षा मन्त्रालयका अनुसार १८ विमानलाई व्यावसायिक उडानका लागि स्वीकृति प्रदान गरिएको छ । युनाइटेड एअरलायन्सका चार, अमेरिकन एअरलायन्स, एटलस एअर, डेल्टा एअरलायन्स र ओम्नी एअरका तीन–तीन तथा हवाइयन एअरलायन्सका दुई विमानले अब उद्धारमा व्यावसायिक उडान गर्नेछन् ।
अफगानिस्तानमा अगस्ट १५ मा तालिबानले सत्ता कब्जा गरेपछि धमाधम विदेशीको उद्धार भइरहेको छ । कयौँ उद्धारको पर्खाइमा छन् । हजारौँ अफगानीहरु देश छोड्न चाहिरहदा उनीहरुले काबुल छाड्न पाएका छैनन् ।
काबुल विमानस्थल बाहिर हजारौँ मानिस भिडभाड गरिरहेका छन् । अहिलेसम्म भागदौड तथा गोली लागेर कम्तीमा २० जनाको मृत्यु भइसकेको छ ।
