८ भदाै, काठमाडौँ ।
कृषि मन्त्रालयले गत आर्थिक वर्षमा उखु किसानहरूलाई सरकारले उपलब्ध गराउने अनुदान रकम सबै पठाइसकेको जनाएको छ ।
गत बर्ष विभिन्न ८ जिल्लाका ११ वटा चिनी उद्योगहरूमा उखु बिक्री गरेका किसानहरूलाई सरकारले ६५.२८ रुपैयाँका दरले अनुदान रकम पठाएको कृषि मन्त्रालयले जनाएको छ ।
किसानहरूले पाउने रकम ७७ करोड ९४ लाख ६४ हजार रुपैयाँ जिल्लास्थित कोष तथा लेखा नियन्त्रकको कार्यालय मार्फत किसानहरूले पाउने गरी पठाएको कृषि मन्त्रालयका सहसचिव डा हरिबहादुर केसीले बताए ।
सरकारले पठाएको रकम किसानहरूले उखु उद्योगलाई बिक्री गरेको उखुको उद्योगले उपलब्ध गराएको तथ्याङककोे आधारमा सोझै किसानहरूको खातामा रकम जम्मा हुने प्रबन्ध गरिएको सहसचिव केसीले जानकारी दिए ।
गत आर्थिक वर्षमा देशभरका ११ चिनी उद्योगहरूले १ करोड १९ लाख ४० हजार ३ सय १९ क्विन्टल उखु क्रसिङ गरेकोमा उद्योगहरूले किसानहरूलाई ५ अर्ब ७२ करोड १० हजार १ सय १३ रुपैयाँ भुक्तानी गर्नुपर्ने मन्त्रालयले जनाएको छ ।
मन्त्रालयले रकम निकासा गरेका जिल्ला मध्ये सर्लाहीका इन्दु शंकर चिनी उद्योग र महालक्ष्मी सुगर मिल प्रालिमा उखु बेच्ने किसानहरूलाई २० करोड ७ लाख ५० हजार, सुनसरीको इष्टर्न सुगर मिलमा उखु बिक्री गर्ने किसानहरूलाई ५ करोड ९० लाख १६ हजार २ सय ५४ रुपैयाँ, कञ्चनपुर जिल्लाका भागेश्वर सुगर एन्ड केमिकल्स र महाकाली सुगर इण्डष्ट्रिजमा उखु बिक्री गर्ने किसानहरूलाई १९ करोड ७ लाख ५ हजार ९ सय ८१ रुपैयाँ, सिराहा जिल्लाको हिमालय सुगर मिलमा उखु बिक्री गर्ने किसानहरूलाई ७ करोड २३ लाख ७४ हजार ६ सय ६७ रुपैयाँ रकम निकासा गरिएको हो ।
त्यसै गरी महोत्तरीको एभरेस्ट सुगर मिलमा उखु बिक्री गर्ने किसानहरूलाई १३ करोड २४ लाख, रौतहटको बाबा बैजुनाथ सुगर मिलमा उखु बिक्री गर्ने किसानहरूलाई ३ करोड ४९ लाख ३६ हजार ६ सय ६० रुपैयाँ, नवलपरासीको बाग्मती खाँडसारी चिनिमिल र सुनवल चिनी उद्योगलाई २ करोड ३८ लाख रुपैयाँ र बारा जिल्लाको रिलायन्स सुगर मिलमा उखु बिक्री गर्ने किसानहरूलाई ६ करोड ५४ लाख ७९ हजार ९ सय ५१ रुपैयाँ उखु बिक्री गर्ने किसानहरूलाई निकासा भएको हो ।
