१४ भदौ, विराटनगर ।
नेपाल आयल निगम विराटनगर डिपोको पार्किङमा राखिएको ट्यांकर चोरी भएको छ । ना ४ ख ४६९ नम्बरको सो डिजेलसहितको ट्याङ्कर आइतबार राति करिब साढे १ बजे चोरी भएको जनाइएको छ ।
चोरीको आरोपमा प्रहरीले विराटनगर महानगरपालिका– ४ का २६ वर्षीय श्रवणकुमार यादवलाई पक्राउ गरेको छ । यादवले राति ट्यांकर लिएर भाग्दै गर्दा बूढीगंगा गाउँपालिका–३ बाँसबारीबाट ट्यांकरसहित उनलाई नियन्त्रणमा लिएको जिल्ला प्रहरी कायालय मोरङले जनाएको छ । यादव निगमका पूर्व चालक हुन् । उनले केही महिना अघि जागिर छाडेका थिए ।
पक्राउ परेका यादवमाथि अनुसन्धान भइरहेको सो कार्यालयले जनाएको छ । चालक यामकुमार खनाल सुत्न र सहचालक शिव खनाल शौचालय गएको मौकामा चाबी खुला नै रहेको ट्यांकर चोरी गरेको खुलेको प्रहरीले जनाएको छ ।
प्रारम्भिक अनुसन्धानमा चोरीमा यादवसहित चार–पाँच जनाको संलग्नता देखिएको र अन्यको खोजी जारी रहेको प्रहरीले जनाएको छ ।
