२० भदौ, काठमाडौँ ।
नेदरल्यान्ड्सले फिफा विश्वकप कतार २०२२ को युरोपियन छनोटमा सानदार जित दर्ता गरेको छ । गएराति भएको खेलमा नेदरल्यान्ड्सले मोन्टेनेग्रोमाथि ४–० को फराकिलो जित निकालेको हो ।
खेलको ३८औं मिनेटमा फरवार्ड मेम्फिस डिपाएको गोलबाट नेदरल्यान्ड्सले सुरुवाती अग्रता लिएको थियो । ६२औं मिनेटमा डिपाएले व्यक्तिगत दोस्रो गोल गर्दै नेदरल्यान्ड्सको अग्रता दोब्बर पारे ।
७०औं मिनेमा जर्जिनो वाइनाल्डमले गोल गर्दै नेदरल्यान्ड्सको अग्रता ३–०को बनाए । त्यसपछि ७६औं मिनेटमा कोडी गाक्पोले गोल गर्दै नेदरल्यान्ड्सलाई ४–० को फराकिलो जित दिलाए ।
जितसँगै समूह ‘जी’ को दोस्रो स्थानमा रहेको नेदरल्यान्ड्सले ५ खेलबाट १० अंक जोडेको छ । पराजित मोन्टेनग्रो भने ७ अंक जोडेर चौथो स्थानमा छ ।
