२ असाेज, काठमाडाैँ ।
नेपाली क्रिकेट टोलीका युवा तीव्र गतिका बलर गुलशन झा ओडिआई खेल्ने इतिहासकै कान्छा एसोसिएट खेलाडी बनेका छन् ।
आइसिसी विश्वकप लिग–२ त्रिकोणात्मक ओडिआई सिरिज अन्तर्गत शुक्रबार अमेरिकाविरुद्ध नेपालका लागि डेब्यू गर्दै उनले याे कीर्तिमान बनाएका हुन् ।
उनी इतिहासकै सबैभन्दा कम उमेरमा डेब्यू गर्ने सूचीमा तेस्रो तथा एसोसिएटतर्फ सबैभन्दा कान्छो खेलाडी बनेका हुन् । गुलशनले नेपालबाट ओडिआईमा सबैभन्दा कम उमेरमा डेब्यू गर्ने कीर्तिमान लेखाएका छन् । गुलशनले शुक्रबार १५ वर्ष २ सय १२ दिनमा अमेरिकाविरुद्ध डेब्यू गरेका हुन् ।
यसअघि नेपालबाट सबैभन्दा कम उमेरमा ओडिआईमा डेब्यू गर्ने कीर्तिमान रोहित कुमार पौडेलको नाममा थियो । रोहितले १५ वर्ष ३ सय ३५ दिनको हुँदा सन् २०१८ अगष्ट १ मा नेदरल्यान्ड्सविरुद्ध डेब्यू गरेका थिए । कुशल मल्लले १५ वर्ष ३ सय ४० दिनको हुँदा २०२० फेब्रुअरी ८ मा अमेरिकाविरुद्धनै कीर्तिपुर मैदानमा डेब्यू गरेका थिए ।
विश्व ओडिआई क्रिकेटमा सबैभन्दा कम उमेरमा डेब्यू गर्ने कीर्तिमान पाकिस्तानका पूर्व खेलाडी हसन राजाको नाममा छ । ब्याट्सम्यान हसन राजाले १४ वर्ष २ सय ३३ दिनको उमेरमा जिम्बावेविरुद्ध १९९६ अक्टोबर ३० मा अक्टोबरमा डेब्यू गरेका थिए । दोस्रो स्थानमा बंगलादेशका मध्यगतिका बलर मोहम्मद शारिफ छन् । शारिफले २००१ अप्रिल ७ मा जिम्बावेविरुद्ध हरारेमा १५ वर्ष १ सय १६ दिनको उमेरमा डेब्यू गरेका थिए ।
ब्याटिङमा नेपालले सबैलाई सरप्राइज दिँदै गुलशनलाई छैटौं नम्बरमा गराएको थियो । गुलशनले ५३ बलमा २ चौका र १ छक्का सहित २८ रनको योगदान दिएका थिए । बलिङमा भने ३ ओभरमा ३१ रन खर्चिन पुगे ।
नेपाल अमेरिकासँग ६ विकेटले पराजित भएको भयो ।
