१८ असाेज, काठमाडौं ।
फिल्म छायांकनका लागि बलिउड कलाकारहरू अनुपम खेर, बोमन इरानी, परिणिती चोपडा काठमाडौँ आइपुगेका छन् । आज बिहानको फ्लाइटमा यी कलाकारहरू नेपाल आएका हुन् ।
कलाकार खेरले ट्विटरमार्फत फिल्म ‘उचाइ’को छायांकनका लागि काठमाडौं आइपुगेको जानकारी दिएका छन् । उनले नेपालमा छायांकन हुने यो चलचित्र उनको करियरको ५२०औं चलचित्र रहेको बताएका छन् ।
फिल्म उचाइको टोली करिब ४० दिन नेपालमा रहने बताइएको छ । सुरुज वर्जत्यको निर्देशनमा निर्माण हुन लागेको उचाइमा अभिनेता अमिताभ बच्चन र डेनी डेनजोङपाको अभिनय रहने भए पनि उनीहरु भने आइपुगेका छैनन् ।
भोलिदेखि काठमाडौँबाट छायांकन सुरु हुने फिल्मलाई लुक्ला, लाङटाङ, मनाङ र मुस्ताङ लगायतमा सुटिङ गरिने जनाइएको छ ।