Nepal Times
Nepal Times
3
Shares

झोराहाटमा चारजना कविका कवितालाई श्रोताको ताली नै ताली

झोराहाटमा चारजना कविका कवितालाई श्रोताको ताली नै ताली

विराटनगर, १२ साउन । झोराहाट नाट्य समूहको आयोजनामा हरेक महिनाको दोस्रो शनिबार हुँदै आएको मासिक साहित्यिक शृंखला सम्पन्न भएको छ ।

कविता सुन्नका लागि झापा, मोरङ, सुनसरी, धनकुटा मात्रै होइन तेह्रथुम, इलामबाट पनि स्रोताको भीड लागेको थियो । हरेक शृंखलामा कविता सुन्न आउने स्रोताको भीड बढ्दै गएको आयोजक समितिका अध्यक्ष भरत गुरागाईंले बताए । “हामी अत्यन्तै उत्साहित भएका छौं स्रोताको उपस्थितिले,” उनले थपे, “साहित्यकार र स्रोताकै मायाका कारण झोराहाट बलियो हुँदै गएको छ ।”

नाट्य समूहको हलमा २६ औं शृंखलाका रुपमा आयोजित कार्यक्रममा चारजना कविले आफ्ना चार–चार वटा कविता प्रस्तुत गरेका थिए । ‘गाउँमा रंगमञ्च, जीवन र संस्कृतिको फरक अभ्यास’ भन्ने नाराका साथ आयोजित कार्यक्रममा कवि सागर तिम्सिनाले ‘मान्छे’, ‘महाकविलाई गाउँमा घुमाउँदा’, साँच्ची किनाराका सदर’ र ‘पार्वती सदा’ तथा हरि कट्टेलले ‘दलित र मुक्तिको आवाज’, ‘मान्छेसँग अग्लिन’, ‘छाउपडीको छोरी व्यथा’ र ‘नेपाल बन्द छ’ शीर्षकका कविता वाचन गरेका थिए ।

त्यस्तै झापा दमककी कवि सुमित्रा बाङ्देल (चेली)ले ‘जन्मभूमि’, ‘भानुभक्त बालाई चिठ्ठी’, ‘प्रश्न समयलाई’ र ‘एउटा यस्तो घर बनाऊँ’ शीर्षकको कविता वाचन गर्दा कवि दीपक शम्चुले ‘आमाको आशीर्वाद’, ‘छोरालाई चिठ्ठी’, ‘एक शिक्षकको बयान’ र ‘आत्महत्या’ शीर्षकको कविता वाचन गरे ।

कार्यक्रमको प्रारम्भमै चारैजना कविलाई प्राज्ञ विवश पोखरेल, साहित्यकार बलराम पोरखेल, गायत्रीकुमार चापागाईं र आयोजक संस्थाका अध्यक्ष भरत गुरागाईंले संयुक्त रुपमा माला लगाएर सम्मान गरेका थिए । झोराहाट नाट्य समूहमा आएर हालसम्म एक सयभन्दा बढी कविले आफ्ना कविता वाचन गरिसकेको कार्यक्रम संयोजक प्रयाग न्यौपानले जानकारी गराए ।

समूहले साहित्यिक कार्यक्रमका साथै नाटक मञ्चन, प्रशिक्षणलगायतका कार्यक्रम पनि सञ्चालन गरिरहेको कार्यक्रमका सहसंयोजक उमेश लुइँटेलले बताए ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.