लमजुङ: मनाङ जोड्ने एक मात्र बेसीसहर–चामे सडक पूर्णरूपमा सञ्चालनमा आएको छ । गत १ असारको बाढीले अवरुद्ध बनेको बेसीसहर–चामे सडक चार महिनापछि पूर्ण रूपमा सञ्चालनमा आएको हो । मनाङका प्रमुख जिल्ला अधिकारी रवीन्द्र आचार्यले आइतबारबाट अवरुद्ध सडक ४ महिनापछि संचालनमा आएको बताए ।
दसैंको समयमा सडक खुलेपछि मनाङवासीमा खुसी छाएको छ । चार महिनापछि चामेबाट गाडीमा आउँदा खुसीको सीमा नै नरहेको चामेका स्थानीय शुशिला लामा बताउँछिन् । बेसिशहरदेखि चामे हुँदै माथिल्लो मनाङको खाङसारसम्म सवारी पुग्ने भएपछि बेंसीसहरका व्यापारी समेत सामान पठाउन सहज भएको भन्दै उत्साहित बनेका छन् । सडक अवरुद्ध हुँदा मनाङ जान तथा आउन हेलिकोप्टरको भर पर्नुपरेको थियो । यसअघि चामे गाउँपालिका र मनाङ ङिस्याङ गाउँपालिका जोड्ने भ्राताङ भिरको सडक मर्मतपछि माथिल्लो मनाङको सडक पनि सञ्चालनमा आएको थियो ।
बेसीसहर–चामे सडकखण्डको मनाङकै तलेखुदेखि भ्राताङबीचको सडकखण्ड मर्मत भएपछी आइतबारबाट पूर्णरुपमा सन्चालनमा आएको हो । बाढीपहिरोले सडक तथा पुलमा क्षति पु¥याएपछि लामो समयसम्म मनाङ बाहिरी जिल्लासँग सडकसम्पर्क विच्छेद हुन पुगेको थियो । मनसुनको सुरुवातमै आएको बाढी पहिरोले मनाङमा भौतिक संरचनामा ठूलो क्षति पु¥याएको थियो । जसका कारण आवतजावतका साथै खाद्यान्न ढुवानीमा समेत हेलिकोप्टरकै भर पर्नुपरेको थियो ।
यसअघि बेसीसहर–चामे सडकखण्डअन्तर्गत लमजुङ–बेसीसहरदेखि ४० किलोमिटर दूरी खोत्रो सिरानतालदेखि ५० किलोमिटर तिमाङसम्मको बीच भागमा अवरुद्ध सडक खुलेसँगै बेसीसहर–चामे सडकमा सीधै सवारी आवतजावत हुँदा यात्रु तथा ढुवानी गर्न केही सहज भएको मनाङका होटल व्यवसायी अस्मिता गुरुङ बताउँछिन् ।
६५ किलोमिटरको बेसीसहर–चामे सडकखण्ड लमजुङतर्फ ३५ र मनाङतर्फ ३० किलोमिटर पर्छ । सडक विभागले आ।व ०५१÷०५२ मा बेसीसहर–चामे सडक निर्माण थालेको थियो । द्वन्द्वका कारण सडक निर्माणमा कठिनाइ भएपछि ०५७ मा तत्कालीन शाही नेपाली सेनालाई जिम्मा लगाएको थियो । ०५२ मा निर्माण सुरु भएको सडक नेपाली सेनाले १९ वर्ष लगाएर ट्रयाक खोलेको थियो । यो सडक सेनाले ०६९ मा सडक विभागलाई हस्तान्तरण गरेयता स्तरवृद्धि हुन सकेको छैन ।, याे समाचार नयाँ पत्रिका दैनिकमा छापिएकाे छ ।
