७ कार्तिक, काठमाडौं ।
रुपन्देहीको लुम्बिनी सांस्कृतिक नगरपालिकाबाट झरना चौधरी वडा सचिवमा निर्वाचित भएपछि अहिले उनको चर्चा चुलिएको छ। १९ वर्षीया उनी शनिबार सम्पन्न भएको एमालेको वडा अधिवेशनबाट ६ नम्बर वडाको सचिवमा निर्विरोध निर्वाचित भएकी हुन्।
प्लस टु अध्ययन गर्दा नै एमालेको अनेरास्ववियुमा क्याम्पस कमिटीमा आबद्ध भएकी उनी अहिले वडा तहको अधिवेशनमा सचिव बनेकी हुन्। ‘अनेरास्ववियुमा आबद्ध भएर अघि बढेकी हुँ। एमालेकै भातृ संगठनमा आबद्ध भइसकेपछि म पार्टी कमिटीमै आबद्ध भएको हो,’ उनले भनिन्।
लुम्बिनी विश्वविद्यालयमा ग्रामिण विकास विषयमा स्नातक अध्ययन गरिरहेकी चौधरी अध्ययन र राजनीतिलाई सँगसँगै अघि बढाएर लैजाने बताउँछिन्। ‘यो त मेरो सुरुवात हो ।
अझ धेरै अघि बढ्नु छ । सानोबाट सुरुवात गरेको हो। युवाहरुले नै अब देशको विकास गर्नुपर्छ,’ उनले भनिन्, ‘राजनीति भनेको समाजसेवा हो भन्ने मेरो बुझाइ छ।’
उनले अबको देश बनाउने दायित्व पनि युवाहरुको नै भएको भन्दै युवा पुस्ता राजनीतिमा आउनुपर्ने बताइन।
उनले आफू एमाले नेता खिमलाल भट्टराई, विद्यार्थी नेता एम पाण्डे, सन्दीप गुप्तालगायत अग्रजबाट प्रेरणा पाएर राजनीतिमा लागेको बताइन्। राजनीतिकै माध्यमबाट समाजसेवा रुपान्तरण गर्न सकिने उनको बुझाइ छ।
झरना अनेरास्ववियुको रुपन्देही जिल्ला सहसचिवसमेत भइसकेकी छन्। सुरुवातमा विद्यार्थी राजनीतिमा लाग्दा केही कठिनाइ देखिए पनि अहिले पारिवारिक सहयोगसमेत मिलेको उनको बुझाइ छ
