१३ कात्तिक, एजेन्सी ।
अर्जेन्टिनी मिडफिल्डर एन्जल डि मारियाले एक गोलसँगै एक असिस्ट दिएपछि पेरिस सेन्ट जर्मेन (पीएसजी) ले लिग वानमा साविकको विजेता लिलमाथि पूनरागमन जित निकालेको छ ।
घरेलु मैदानमा एक गोलले पछि परेको अवस्थामा पीएसजीले २–१ को पूनरागमन जित निकालेको हो । पीएसजीको जितमा एन्जल डि मारिया र मार्किन्हसले गोल गरे । पहिलो हाफमा पछि परेको पीएसजीले दोस्रो हाफमा दुई गोल गर्दै जित निकाल्न सफल भएको हो ।
पार्क डेस प्रिन्सेसमा शुक्रबार राति भएको खेलमा घरेलु टोली खेलको ३१औं मिनेटमा जोनाथान डाभिडको गोलमा पछि परेको थियो । उनले बुराक इल्माजको पासमा गोल गरेका थिए । ७४औं मिनेटमा मार्किन्हसले गोल गर्दै खेललाई १–१ गोलको बराबरीमा ल्याए । मार्किन्हसले एन्जल डि मारियाको पासमा गोल गरेका थिए ।
निर्धारित समयको खेल सकिन दुई मिनेटमा बाँकी रहँदा पहिलो गोलमा असिस्ट दिएका एन्जल डि मारियाले गोल गर्दै पीएसजीको जित पक्का गरे । डि मारियाले नेयमारको पासमा गोल गर्न सफल भए ।
जितपछि शीर्षस्थानमा रहेको पीएसजीको १२ खेलबाट ३१ अंक पुगेको छ ।
