१३ कात्तिक, लण्डन ।
प्रधानमन्त्री शेरबहादुर देउवाले नेपालमा वैदेशिक लगानी भित्राउनका लागि गैर आवासीय नेपाली सङ्घ (एनआरएन) लाई आग्रह गरेका छन् ।
एनआरएन युके शाखासँगको भेटमा प्रधानमन्त्री देउवाले वैदेशिक लगानी भित्र्याउनका लागि लगानी कर्तालाई के के सुविधा दिनुपर्ने हो सरकार तयार रहेको बताए ।
प्रधानमन्त्री देउवाले सबैको सहयोगमा नेपाली जनतालाई चैतभित्र कोरोना विरुद्धको खोप लगाइसकिने योजना भएकाले सबैलाई सहयोग गर्न आग्रह गरे ।
नागरिकतालगायत एनआरएनका समस्याका विषयमा प्रधानमन्त्री देउवाले राजनीतिक दलको सहमति र संसद्बाट पारित गर्नुपर्ने भएकाले सबै मिलेर जानुपर्नेमा जोड दिए ।
एनआरएन युके शाखाका संरक्षक शेरबहादुर सुनारले भूतपूर्व गोर्खा सेनाको समस्या समाधानका लागि विशेष पहल गरिदिन अनुरोध गरे ।एनआरएन युके शाखा अध्यक्ष प्रेम गाहा मगरले नेपालमा लगानी मैत्री वातावरण बनाउन आग्रह गर्दै एनआरएनलाई नागरिकता र भिसाको समस्या समाधान गर्न अनुरोध गरे ।
