१७ कात्तिक, काठमाडौं।
नेपाली कांग्रेसका प्रभावशाली नेता तथा पूर्वमन्त्री गगनकुमार थापाले आगामी निर्वाचनमा नेकपा (एमाले) लाई कुचो लगाएर बढार्ने बताएका छन् । बुधबार भक्तपुर सुर्य बिनायक नगरपालिका वडा नम्बर–७ गुण्डुमा शुभ दिपावली र छठ पर्वको अवसरमा नेपाली कांग्रेसले आयोजना गरेको शुभकामना तथा पार्टी प्रवेश कार्यक्रमलाई सम्बोधन गर्दै उनले यस्तो बताएका हुन् ।
उनले भने,‘यसपटकको चुनावमा नेकपा एमालेलाई कुचो लगाएर बढार्ने हो। बढार्दा कुनाकाप्चामा धुलो अड्कियो भने भ्याकुम लगाउने हो । सिङ्गल–सिङ्गल लड्ने भनेको होइन? हामी विगतमा सिङ्गल नै लडेर पहिलो पार्टी बनेको हो ।’
उनले अहिले आफूहरुले चाहेर सरकारको नेतृत्व नलिएको भन्दै यो परिस्थितिले दिएको जिम्मेवारी भएको सुनाए । अब जिम्मेवारी लिएपछि यसलाई पूरा गर्नुपर्नेमा उनको जोड छ । आफूहरु युवा पुस्तामाथि ठूलो धोका भएको भन्दै आगामी निर्वाचनमा प्रभावकारी भूमिका खेल्नुपर्नेमा उनले जोड दिए ।
