१८ कार्तिक, अर्घाखाँची ।
दुई साता अघिको बेमौसमी वर्षाका कारण शितगंगा नगरपालिकामा मात्र १ करोड ८७ लाख रुपैयाँको धानबालीमा क्षति पुगेको छ ।
नगरपालिकाले १४ मध्ये १३ वडामा क्षतिको विवरण संकलन गर्दा ७ सय ६६ किसानको ७९ हजार क्विन्टल धानमा क्षति पुगेको हो ।
धानबालीमा १ करोड ८७ लाख ७३ हजारको क्षति पुगेकाले प्रदेश र संघ सरकारसँग राहत माग गरिएको उपमेयर टीका रेश्मीले जानकारी दिए।
कहाँ कति क्षति ?
शितगंगा १ मा १३ जना किसानको २ सय ४ क्विन्टल, २ मा १३ किसानको १ सय १४ क्विन्टल, ३ मा ३० किसानको ४ सय ६ क्विन्टल, ४ मा २६ जना किसानको ४ सय ३८ क्विन्टल, ५ मा १६ किसानको १ सय ७७ क्विन्टल र ६ मा २७ किसानको ३ सय १४ क्विन्टल धान क्षति भएको तथ्यांक छ ।
त्यस्तै, शितगंगा ७ मा २५ किसानको ३ सय ३५ क्विन्टल, ८ मा चार किसानको १६ क्विन्टल, १० मा ५० किसानको ६ सय ३० क्विन्टल, ११ मा १ सय २२ किसानको १ हजार ७ सय १५ क्विन्टल, १२ मा ४८ किसानको ६ सय १० क्विन्टल, १३ मा १ सय ४८ किसानको ३ हजार २ सय २ क्विन्टल र १४ मा २ सय ४४ जना किसानको २ हजार ७ सय ९७ क्विन्टल धानमा क्षति पुगेको कृषि शाखा प्रमुख अनिल शर्माले जानकारी दिए ।
संघ सरकारले बेमौसमी वर्षाका कारण धानबालीमा भएको क्षतिका आधारमा राहत उपलब्ध गराउने निर्णय गरिसकेको छ ।
