२१ कार्तिक, पोखरा ।
स्थानीय फेवा टेलिभिजनद्वारा सञ्चालित फेवा चौतारी सांस्कृतिक टिमले आइतबार आयोजना गरेको देउँसीभैलो कार्यक्रममा गण्डकी प्रदेशका तीन मन्त्री छम्छम्ती नाचे ।
अर्थमन्त्री रामजी बरालको निवासमा आयोजित कार्यक्रममा उनीसँगै भूमि व्यवस्था, कृषि, सहकारी तथा गरिबी निवारणमन्त्री चन्द्रबहादुर बुढा र वन, वातावरण तथा भूसंरक्षणमन्त्री दीपक थापाले एउटै मञ्चमा देउसी भैलो कार्यक्रममा नृत्य गरेका हुन् ।
नेपालको मौलिक कला संस्कृतिको जर्गेना गर्ने उद्देश्यले आयोजना भएको उक्त कार्यक्रममा उहाँहरूले नेपालको मौलिक कला संस्कृतिको संरक्षणमा दिगो रूपमा लाग्न सुझाव दिएका छन् ।
पछिल्लो समयमा पश्चिमा संस्कृतिले नेपालमा प्रश्रय पाइरहेको अवस्थामा नेपाली लोक भाकासहितको कला संस्कृतिलाई संरक्षण गर्न आवश्यक भएको अर्थमन्त्री बरालले बताए ।
यसैबीच अर्थमन्त्री निवासमा राष्ट्रिय जनमोर्चाको रक्तिम सांस्कृतिक टोलीले समेत देउसीभैलो कार्यक्रम आयोजना गरेका थियो । प्रदेशसभा सदस्य पियारी थापा, पार्टीका गण्डकी प्रदेश अध्यक्ष शंकर बरालसहितको टोली देउसीभैलोमा सहभागी थिए ।
