२३ कात्तिक, एजेन्सी ।
आइसिसी टि२० विश्वकप २०२१ मा भारतले अन्तिम खेलमा नामिबियामाथि सानदार जित निकालेकाे छ । सुपर १२ को समूह २ मा रहेको भारतले नामिबियालाई ९ विकेटले हराउँदै तेस्रो स्थानमा रहँदै विश्वकप २०२१ बाट बाहिरिएको छ ।
दुबई इन्टरनेशनल क्रिकेट स्टेडियममा जितको लागि १ सय ३३ रनको विजयी लक्ष्य पछ्याएको भारतले १५.२ ओभरमा २ विकेट गुमाउँदै पूरा गर्यो । भारतका ओपनर लोकेश राहुल ३६ बलमा ४ चौका र २ छक्का सहित ५४ रनमा अविजित रहे । सूर्यकुमार यादव १९ बलमा ४ चौका सहित २५ रनमा अविजित रहे । ओपनर रोहित शर्मा ३७ बलमा ७ चौका र २ छक्का सहित ५६ रनमा क्याच आउट भए ।
भारतलाई ओपनर रोहित शर्मा र लोकेश राहुलले पहिलो विकेटका लागि ९.५ ओभरमा ८६ रनको साझेदारी गर्दै राम्रो सुरुवात दिलाएका थिए । नामिबियाका जेन फ्रिलिंकले जेन ग्रीनबाट रोहितलाई क्याच गराउँदै साझेदारी तोडेका थिए ।
त्यसअघि टस हारेर ब्याटिङको निम्तो पाएको नामिबियाले निर्धारित २० ओभरमा ८ विकेट गुमाउँदै १ सय ३२ रन बनाएको थियो । नामिबियाका डेविड विसेले २५ बलमा २ चौका सहित सर्वाधिक २६ रन बनए । विसे २०१६ मा दक्षिण अफ्रिकाबाट टि२० विश्वकप खेलेका क्रिकेटर हुन् ।
ओपनर स्टेफन बार्डले २१ बलमा १ चौका र १ छक्का सहित २१ रन बनाए । नामिबियालाई ओपनर माइकल भ्यान लिङ्गेन र स्टेफन बार्डले पहिलो विकेटका लागि ४.४ ओभरमा ३३ रनको साझेदारी गर्दै मध्यम सुरुवात दिलाएका थिए । तीव्र गतिका बलर जस्प्रित बुमराहले लिङ्गेनलाई १४ रनमा मोहम्मद शामीबाट क्याच गराउँदै पहिलो सफलता दिलाएका थिए । त्यसपछि भने नामिबियाले लगातार विकेट गुमाउन पुग्यो ।
के्रग विलियम्सलाई छैटौं ओभरको तेस्रो बलमा रविन्द्र जडेजाले शून्यमा स्टम्पिङ आउट गराए । जडेजालेनै आठौं ओभरको चौथो बलमा बार्डलाई एलबीडब्लू आउट गराएका थिए । जेन निकोल लोफ्टी इटनलाई रविचन्द्रन आश्विनले क्याच गराउँदा नामिबिया ९.१ ओभरमा ४७–४ को अवस्थामा पुगेको थियो । १४ रन जोड्न ४ विकेट गुमाएपछि नामिबिया खेलमा समस्यामा परेको थियो ।
कप्तान गेरहार्ड इरास्मस २० बलमा १ चौका सहित १२ रनमा आउट भए । जेजे स्मित ९ र जेन ग्रीन शून्यमा आउट भएका थिए । जेन फ्रिलिंक १५ बलमा १५ रनमा अविजित रहे । रुबेन ट्रम्पलम्यान ६ बलमा १ चौका र १ छक्का सहित १३ रनमा अविजित रहे । भारतका स्पिनर रविन्द्र जडेजाले ४ ओभरमा १६ रन खर्चेर ३ विकेट लिए । रविचन्द्रन आश्विनले ४ ओभरमा २० रन खर्चेर ३ विकेट लिए । जस्प्रित बुमराहले ४ ओभरमा १९ रन खर्चेर २ विकेट लिए ।
भारत ५ खेलमा ३ मा जित र २ मा हार सहित ६ अंकका साथ तेस्रो स्थानमा रहेर बाहिरियो । भारतले अव अर्को सातदेखि घरेलु मैदानमा न्युजिल्यान्डसँग तीन टि२० आई सिरिज र दुई टेस्ट सिरिज खेल्नेछ । पहिलो टि२० खेल १७ नोभेम्बरमा हुनेछ ।
नामिबिया ५ खेलमा १ मा जित र ४ मा हार सहित २ अंकका साथ पाँचौं स्थानमा रहेर बाहिरियो । पाकिस्तान सुपर १२ को समूह २ मा ५ खेलमा अपराजित रहँदै १० अंकका साथ शीर्ष स्थानमा रहेर सेमिफाइनलमा पुगेको छ । अपराजित रहँदै सेमिफाइनल खेल्ने पाकिस्तान यस विश्वकपमा एक्लो टोली हो । न्युजिल्यान्डले ५ खेलमा ४ मा जित र १ मा हार सहित सहित ८ अंकका साथ दोस्रो स्थानमा रह्यो ।
सुपर १२ को समूह १ मा इंग्ल्यान्ड ५ खेलमा ४ मा जित र १ मा हार सहित ८ अंकका साथ नेटरनरेटका आधारमा शीर्ष स्थानमा रहेको थियो । अष्ट्रेलिया ५ खेलमा ४ मा जित र १ मा हार सहित ८ अंकका साथ नेटरनरेटको आधारमा दोस्रो स्थानमा रहँदै सेमिफाइनल खेलेको हो ।
पहिलो सेमिफाइनलमा बुधबार इंग्ल्यान्ड र न्युजिल्यान्डबीच शेख जायद स्टेडियम आबूधाबीमा हुनेछ । दोस्रो सेमिफाइनलमा बिहीबार पाकिस्तान र अष्ट्रेलियाबीच दुबई इन्टरनेशल क्रिकेट स्टेडियममा प्रतिस्पर्धा हुनेछ । फाइनल आइतबार दुबईमा हुनेछ ।
