काठमाडौं : आफ्नै पार्टीभित्र न्याय माग्दै केन्द्रीय कार्यालय सानेपामा अनशन बस्न आएका कांग्रेस सभापति शेरबहादुर देउवाको गृहजिल्ला डडेलधुराका जिल्ला सभापति कर्ण मल्लसहितका नेताहरुले क्रियाशील सदस्यताको विवाद समाधान गरेर मात्र अधिवेशन गर्नुपर्ने बताएका छन् ।
क्रियाशील सदस्यको विषयलाई लिएर बुधबारदेखि पार्टी कार्यालय सानेपामा रिले अनशन जारी छ । पार्टी केन्द्रीय कार्यालयमा अनशनरत जिल्ला सभापति कर्ण मल्लले नेपाल समाचारपत्रलाई जानकारी दिएअनुसार केन्द्रबाट पठाइएको क्रियाशील सदस्यता खारेज गरी जिल्लाबाट सिफारिस भएको क्रियाशील सदस्यता कायम नगरेसम्म आन्दोलन जारी रहने बताउनुभएको छ ।डडेलधुरा जिल्ला सभापति मल्लले जानकारी दिएअनुसार वडाबाट सिफारिस भएर आएको ४ सय ६० जना क्रियाशील सदस्यता काटेर सभापति देउवाले मनोमानी ढंगले ३ सय १२ जना क्रियाशील सदस्य थपेर वडा अधिवेशन गरेपछि विवाद उत्पन्न भएको थियो ।
जिल्ला समितिको बैठक बसी प्रहरी लगाएर जबरजस्ती गरिएको अधिवेशन नमान्ने भन्दै भदौ २२ गते नै ध्यानाकर्षण गराएको थियो । विवाद समाधान गर्न पछि पनि पटक–पटक सभापति देउवालाई पत्र पठाए पनि बेवास्ता गरेपछि पार्टी कार्यालयमै अनशन बस्ने गरी आन्दोलन थालिएको मल्ल बताउनुहुन्छ । केन्द्रीय निर्वाचन समितिले भने यसअघि भएको अधिवेशनलाई मान्यता दिइसकेको छ ।कांग्रेस सभापति देउवाको गृहजिल्ला डडेलधुरामा ५२ वटा वडा छ भने ७ वटा पालिका छ ।
एकमात्र निर्वाचन क्षेत्र भएको डडेलधुराबाट सभापति देउवाले निर्वाचन लड्दै आएका छन् । पार्टीको आधिकारिक उम्मेदवारको क्रियाशील हटाएर बागी उम्मेदवारको क्रियाशील थप्ने सम्मको हर्कत भएको भन्दै जिल्ला सभापति मल्ल भन्नुहुन्छ– ‘सभापति देउवा गिरिजाप्रसाद कोइरालाभन्दा पनि क्रूर भएर निस्किए ।’ उहाँले उदाहरण दिँदै थप्नुभयो– ‘स्थानीय निर्वाचनमा अजयमेरु गाउँपालिकाको उपाध्यक्ष पदमा कांग्रेसको आधिकारिक उम्मेदवार कमला विष्टको नाम क्रियाशील सूचीबाट हटाइएको छ भने विद्रोही उम्मेदवार शिवलाल शाहको नाम थपिएको छ ।’, याे समाचार नेपाल समाचारपत्र दैनिकमा रामकृष्ण चापागाईंले देखेका छन् ।
