९ मंसिर, विराटनगर ।
मोरङको बुढीगंगास्थित आरती स्ट्रीप्सका सञ्चालकले प्रशासन प्रमुख दिवस नेपालमाथी निर्घात कुटपिट गरेका छन् । बुधबार साँझ आरती स्ट्रीप्सका सञ्चालक सञ्जय सिंघलसहित भारतीय मजदुरले उनीमाथि बुधबार कुटपिट गरेका हुन् ।
कुटपिटबाट घाईते नेपालको विराटनगरस्थित कोशी अस्पतालमा उपचार भइरहेको छ । आरती स्ट्रिप्सका भाइस प्रेसिडेन्ट विशाल गुप्ताले पेस्तोल देखाएको र सञ्चालक सिंघल तथा निर्देशक एसपी बर्मासहितको टोलीले निर्घात कुटपिट गरेको पीडितको आरोप छ ।
रडले प्रहार गर्दा नेपालको टाउकोमा गम्भीर चोट लागेको छ । त्यस्तै उनको छाती र ढाँडलगायत शरीरको विभिन्न भागमा चोट लागेको देखिएको अस्पतालका चिकित्सकले बताएका छन् ।
आरती स्ट्रीप्सका संचालक सिंघलपनि घाइते रहेको प्रहरीले जनाएकाे छ । सिंघल पनि कोशी अस्पतालमा रहेको मोरङ प्रहरीका प्रवक्ता डिएसपी दिपक श्रेष्ठले जानकारी दिए । उनले के कारणले घटनाको भएको हो यस विषयमा प्रहरीले अनुसन्धान गरिरहेकाे बताए ।
आरती स्क्रिप्स भारतीय लगानीको उद्योग हो । यसले जस्ता पाता र पाइप उत्पादन गर्दै आएको छ । सञ्चालक सिंघलले यसअघि पनि पटक- पटक नेपाली कर्मचारीमाथि कुटपिट गरेकाे बाहिरिएकाे छ ।
