९ मंसिर, काठमाडौं।
भारतीय सेनाले नेपाली सेनालाई पाँच वटा ‘वर्कशप ट्रक’ हस्तान्तरण गरेको छ। बिहीबार आयोजित कार्यक्रममा भारतीय सेनाले उपहारस्वरुप उक्त एलपीटीए वर्कशप ट्रकहरु नेपाली सेनालाई दिएको हो।
नेपालस्थित भारतीय दूतावासका रक्षा सहचरी कर्णेल अमित शर्माले भारतीय सेनाको तर्फबाट नेपाली सेनाका सहायक रथी कृष्णदेव भट्टलाई ट्रकहरु हस्तान्तरण गरेका हुन्। ट्रकहरु कम्प्याक्ट मोबाइल वर्कशपको रुपमा प्रयोग गर्न सकिन्छ।
रक्षा सहकार्यअन्तर्गत उपलब्ध गराइने सैन्य सामाग्रीले भारतीय सेना र नेपाली सेनाबीचको बलियो सम्बन्ध रहेको पुष्टि गर्ने भारतीय दूतावासले जनाएको छ।
आफ्नो संगठनलाई अझ सशक्त र आधुनिक बनाउन नेपाली सेनाले गरेको प्रयासलाइ भारतीय सेनाले निरन्तर सहयोग गर्ने दूतावासले जनाएकाे छ। २०७५ मंसिर २८ गते नेपाल-भारत द्विपक्षीय परामर्श समूहको बैठकमा भएको सहमतिअनुसार भारतीय सेनाले उपहार स्वरुप वर्कशप ट्रक उपलब्ध गराएको नेपाली सेनाले जारी गरेको विज्ञप्तिमा उल्लेख छ।
