१८ मंसिर, एजेन्सी।
अमेरिकी विदेशमन्त्री एन्टोनी ब्लिन्केनले चीनले ताइवानमाथि अधिकार जमाउन कुनै पनि कदम चाले ‘भयानक परिणाम’ को सामना गर्नुपर्ने चेतावनी दिएका छन् । शुक्रबार रोयटर्स नेक्स्ट कन्फेरेन्समा बोल्दै उनले चिनियाँ नेतृत्वले ताइवानको मुद्दाबारे संकटलाई निम्तो नदिने विश्वास व्यक्त गरे ।
ब्लिन्केनले चीन ताइवानको स्वायत्तता खोस्ने दिशामा अग्रसर भइरहेको बताए । उनले ताइवानलाई अमेरिकाले आफ्नो रक्षा गर्नका लागि सघाउने बताए । चीनले ताइवानको स्वायत्तता खोस्ने प्रयास गरे कसैका लागि पनि राम्रो नहुने उनकाे भनाइ थियाे। अमेरिकी राष्ट्रपति जो बाइडनको प्रशासनले ताइवानलाई अन्तर्राष्ट्रिय मान्यता दिलाउन प्रयास गरिरहेको छ । यद्यपि चीनले भने ताइवान आफ्नो भूमि भएको बताउँदै आएको छ ।
साथै ताइवानको मुद्दा आफ्नो आन्तरिक विषय भएकाले यसमा दखल नदिन उसले अमेरिकालाई चेतावनी दिइसकेको छ । यसअघि चिनियाँ राष्ट्रपति सी चिनफिङले अमेरिकी राष्ट्रपति बाइडेनलाई ताइवानको मुद्दामा दखल दिनु भनेको आगोसँगै खेल्नु जस्तै भएको चेतावनी दिएका थिए ।
