१९ मंसिर, एजेन्सी ।
ज्वालामुखी सक्रियताका हिसावमा विश्वमा अग्रणी मुलुक भित्र पर्ने दक्षिण पूर्वी एशिया र ओशिनियामा फैलिएको विशाल राष्ट्र इन्डोनेसियाको जाभा प्रान्तमा ज्वालामुखी विष्फोट हुँदा कम्तीमा १३ जनाको मृत्यु भएको छ । विष्फोटमा परी दर्जनौँ घाइते भएका छन् ।
जाभा आइल्याण्डको माउन्ट समेरुमा ज्वालामुखी विस्फोट भएको हो । इन्डोनेसियाको नेशनल बोर्ड अफ डिजास्टर म्यानेजमेन्ट (बिएनपिबी) ले आइतबार जारी गरेको वक्तव्यमा ९८ जना घाइते भएको उल्लेख छ । शनिबार भएको ज्वालामुखी विस्फोटका कारण दशौँ हजार मानिस विस्थापित भएका अन्तराष्ट्रिय सञ्चारमाध्यमहरूले जनाएका छन् ।
ज्वालामुखीबाट निस्किएको तातो लाभा तथा खरानीले स्थानीय गाउँ ढाकिँदा मानवीय क्षति भएको हो । ज्वालामुखीबाट नजिक रहेको लुमाजङ जिल्लाको गाउँबाट कम्तीमा ३०० परिवारलाई सुरक्षित स्थानमा सारिएको स्थानीय अधिकारीले बताएका छन् । उद्धार तथा राहतको काम जारी रहेको समाचारमा जनाइएको छ । तर बेपत्ताहरुको यकिन संख्या भने थाहा नभएको वक्तव्यमा उल्लेख छ ।
१७ हजार ५ सय ८ द्वीप र करिब २७ करोड जनसंख्या भएको इन्डोनेसिया विश्वको चौथो अधिक जनसंख्या भएको मुलुक हो । यसअघि सन् २०१८ मा ज्वालामुखीपछि आएको सुनामीका कारण इन्डोनेसियामा २ सय २२ जनाभन्दा बढीको मृत्यु भएको थियो । इन्डोनेसियाको सुन्डा स्त्राइटको किनारामा भएको घटनामा परी अन्य सयौँ घाइते भएका थिए । इन्डोनेसियामा १ सय २७ सक्रिय ज्वालामुखीहरू छन् र लगभग ५० लाख मानिसहरू खतराको क्षेत्रहरूमा बसोबास गर्दछन् ।
