काठमाडौं : सत्तारूढ नेपाली कांग्रेसको महाधिवेशन नजिकिँदै गर्दा सभापतिमा संस्थापन इतरपक्षकै चार जनाबीच कुनै सहमति नहुने देखिएपछि हालका सभापति शेरबहादुर देउवालाई पुनः सभापतिमा जित हात पार्न सहज देखिएको छ । यद्यपि, संस्थापन इतरका नेताहरू अन्तिम समयसम्म पनि एकजुट हुँदै देउवालाई कडा टक्कर दिने गृहकार्यमा जुटेका छन् ।
काग्रेसको १४औं महाधिवेशनमा सभापतिमा उठ्ने घोषणा गरेका नेता शेखर कोइराला भने पार्टीमा आमूल रूपान्तरणका लागि आफूले सभापतिमा उम्मेदवारी दिएकाले आफ्नो जित हुने दाबी गरेका छन् । सोमबार विभिन्न सञ्चारमाध्यमका सम्पादकसँग अन्तक्र्रिया गर्दै कांग्रेस नेता कोइरालाले संस्थापन इतरका चार नेताहरू एकजुट हुने हो भने देउवालाई सभापतिमा सजिलैसँग पराजित गर्न सकिने बताए ।
हालसम्म कांग्रेसमा संस्थापन इतर पक्षका शेखरलगायत रामचन्द्र पौडेल, प्रकाशमान सिंह र शशांक कोइरालाले १४औं महाधिवेशनमा सभापतिमा उम्मेदवारी दिने घोषणा गरिसकेका छन् । तर, उनीहरू चार जनाबीच सहमति खोज्ने प्रयासलाई तीव्रता दिइएको नेता कोइरालाले जानकारी दिए । ‘हामी चार जनाबीच सहमति जुटाएर एक जनालाई मात्रै सभापतिको उम्मेदवार बनाउने गृहकार्यलाई तीव्रता दिएका छांै,’ कोइरालाले सम्पादकसँगको छलफलमा भने ।
कोइरालाले नेपाली राजनीतिमा नैतिकता र इमानदारिताजस्ता विषय ओझेलमा पर्दै गएकाले आफूले सभापतिमा जितेमा राजनीतिलाई नैतिक र इमानमा चल्ने बनाउने स्पष्ट पारे । उनले अहिले देशभरका कार्यकर्ता र प्रतिनिधिहरूले आफूलाई सभापतिमा उठ्न सुझाव दिएकाले कार्यकर्ता र प्रतिनिधिको भावनाअनुसार नै सभापतिमा उम्मेदवारी दिने घोषणा गरेको जानकारी दिए । ‘म कमजोर छैन, निर्वाचनमा मेरो जित सुनिश्चित छ त्यसैले अन्य तीन जनाले आफूलाई छोडिदिनुपर्नेमा उनको जोड छ । ‘रामचन्द्र, प्रकाशमान र शशांकले अब सभापतिका लागि मलाई छोडिदिनुपर्छ, त्यस्तो अवस्थामा मैले सभापतिमा सहजै जित हासिल गर्न सक्छु,’ नेता कोइरालाले भने । शेखरले अन्तिम अवस्थामा गएर आफूलाई छोडिदिने दाबी शशांकले गरेका छन् । त्यसैले अब रामचन्द्र र प्रकाशमान पनि उदार भएर मेरो नाममा सहमति गर्नुपर्छ, त्यसो भएमा सभापतिमा हामी सजिलैसँग जित्छौं,’ कोइरालाले भने ।
कोइरालाले पछिल्लो समयमा सभापति देउवा आफ्नो समूहमाथि खेल्ने प्रयास गरेकाले सर्तक र चनाखो हुनुपर्ने आवश्यकता आंैल्याए । शेखरकाअनुसार हाल जिल्ला तथा प्रदेशमा भएका निर्वाचनमा आफूहरूको समूहले बलियो नतिजा निकाल्न सफल भएको दाबी गरे । उनका अनुसार प्रदेश १, बाग्मती, लुम्बिनी प्रदेश र कर्णाली प्रदेशमा संस्थापन इतर निकै बलियो छ ।
निधिका कारण देउवालाई पनि कठिन
नेता कोइरालाका अनुसार संस्थापन पक्षबाट पनि सभापतिमा विमलेन्द्र निधिले उम्मेदवारी घोषणा गरिसकेकाले सभापति जित्न देउवालाई निकै कठिन हुने दाबी गरे । सभापतिमा उठ्ने तयारी गरेका कोइरालाले प्रधानमन्त्री तथा सभापति कोइरालाले देशका विभिन्न स्थानमा भएका प्रतिनिधिको चुनावमा, चरम धाँदली गरेको आरोप लगाए । प्रशासन, सीडीओको आडमा निर्वाचन अधिकृतलाई समेत प्रभावमा पारेर निर्वाचनमा व्यापक धाँधली भएको छ,’ कोइरालाले भने ।
शशांकको सपोर्ट पाउने दाबी
नेता कोइरालाले सभापतिमा उम्मेदवारी घोषणा गरेका शंशाकको सपोर्ट आफूलाई हुने दाबी गरे । सम्पादकसँगको छलफलमा सहभागी भएका कांग्रेसका युवा नेता चन्द्र भण्डारीले संस्थापन इतरमध्येबाट सभापतिमा उम्मेदवारी घोषणा गरेका चार जनामध्ये दुई जनालाई सहमतिमा ल्याइएको दाबी गरे । अब बाँकी दुईमध्येबाट एक जना मात्रै सर्वसम्मत उम्मेदवारी दिने गरी अघि बढेका छांै,’ नेता भण्डारीले भने ।,याे समाचार राजधानी दैनिकमा छापिएकाे छ ।
