विराटनगर, ११ वैशाख । आगामी ३० वैशाखमा हुने स्थानीयतहको निर्वाचनका लागि सत्ता गठबन्धनको प्रमुख दल नेपाली कांग्रेस उम्मेदवार टुंग्याउने विषयमा अझै अलमलमा परेको छ । उमेदवारी दर्ताको समय शुरु भईसक्दा समेत प्रदेश १ मा नेपाली कांग्रेसबाट उमेदवार तय हुन सकेका छैनन् ।
निर्वाचन आयोगले आइतबार र सोमबार मनोनयन दर्ताको लागि समय तोकेको छ । तर, सत्ता गठबन्धनको प्रमुख दल नेपाली कांग्रेसले आइतबार बिहानसम्म पनि प्रदेश एकका सबै जिल्लाका उमेदवार तय गर्न सकेको छैन ।
कांग्रेस प्रदेश १ का उपसभापति रमेशजंग रायमाझीले हालसम्म ताप्लेजुङ, भोजपुर, संखुवासभा, ओखलढुंगा, धनकुटा र तेह्रथुम जिल्लाका उमेदवार तय भईसकेको जानकारी दिए । उनले आज फेरि बैठक बसेर बाँकी जिल्लाका स्थानीय तहको उमेदवार टुंगो लगाइने बताए ।
धेरै स्थानीय तहको विषयमा कांग्रेसको प्रदेश समितिलाई सिफारिसनै प्राप्त नहुँदा छलफल अघि बढाउन र उमेदवार चयन गर्न समस्या भएको रायमाझीले बताए ।
उमदेवार बन्नेहरुको नाम पार्टीको पालिकास्तर हुँदै जिल्ला र प्रदेशसम्म पठाउनु पर्ने प्रावधान छन् । नेपाली कांग्रेसले केन्द्रीय समितिले महानगर र उपमहानगरमा उठ्ने मेयर/उपमेयरको उमेदवारको टुंगो लगाउँछ । तर, त्यस बाहेक भने प्रदेशले सिफारिस गर्छ । प्रदेश एकमा १३७ स्थानीय तह छन् ।
ती तहहरुमा कांग्रेससहितका दलले गठबन्धन गर्ने छलफलका कारण पनि कतिपय पालिकामा उमेदवार चयन हुन सकेका छैनन् । कांग्रेस प्रदेश समितिले राजनीतिक रुपले महत्वपूर्ण मानिएका झापा, मोरङ र सुनसरीका उमेदवार छान्ने विषयमा अझै छलफल शुरु गरेको छैन । अधिकांश पालिकाहरुमा कांग्रेसको स्थानीय समितिले गठबन्धनको विरोध गरिरहेका छन् ।
