२ जेठ, धनगढी । धनगढी उपमहानगरपालिकाको मेयरमा मतगणनाको सुरुवातदेखि अग्रता लिइरहेका स्वतन्त्र उम्मेदवार गोपाल हमालले मतान्तर बढाउँदै लगेका छन् ।
धनगढी उपमहानगरपालिका(१ को सकिएर वडा नम्बर २, ३, १८ र १९ को मतगणना भइरहेका बेला निकटतम् प्रतिद्वन्दीभन्दा हमालले झण्डै दोब्बर मतले अग्रता लिएका छन् ।
पछिल्लो मत परिणाम अनुसार १० हजार ३२९ मतको गणना सकिंदा हमालले चार हजार ५३८ मत प्राप्त गरेर आफ्नो अग्रतालाई कायमै राखेका छन् ।
उनलाई पछ्याइरहेका नेपाली कांग्रेसका नृपबहादुर वडले दुई हजार ११० मत कम ल्याएका छन् । वडले दुई हजार चार सय २८ मत ल्याएका छन् । नेकपा एमालेका रणबहादुर चन्दले भने एक हजार १४० मत प्राप्त गरेका छन् ।
मतगणनाको सुरुदेखि नै अग्रता लिएका हमाल सत्तारुढ पाँच दलीय गठबन्धनका लागि चुनौती बनेका छन् ।
खासगरी नेपाली कांग्रेसको गढका रुपमा चिनिने धनगढी बजार क्षेत्रको १, २ र ३ नम्बर वडामा हमालले वड र चन्दको तुलनामा धेरै मत प्राप्त गरिरहेका छन् ।
हमालले अन्य वडामा समेत यही गतिलाई कायम राखेमा गठबन्धनका उम्मेदवारलाई ठूलो चुनौती हुने आँकलन गरिएको छ ।
तर गठबन्धनले भने ग्रामीण क्षेत्रको मत गणना गर्न बाँकी रहेको भन्दै अवस्था सुधार हुने आशा राखेको छ ।
