८ असार, विराटनगर । विराटनगरको प्राविधिक कलेजहरूले विद्यार्थीबाट अतिरिक्त शुल्क असुल्ने गरेको पाइएको छ। नर्सिङ, सिएमए, हेल्थ असिस्टेन्ट अध्ययन गराउँदै आएका कलेजहरूले सरकारले तोकेको भन्दा बढी रकम लिने गरेको फेला परेको हो ।
विराटनगरमा रहेको विराट हेल्थ कलेजले प्राविधिक शिक्षा तथा व्यवसायीक तालिम परिषद (सिटिईभिटी)ले तोकेको भन्दा बढी शुल्क लिएको भन्दै विद्यार्थीले विद्यार्थी संगठन गुहारेपछि विद्यार्थी संगठनहरुले बुधबार छलफल गरेका छन् ।
विद्यार्थीको गुनासोपछि विद्यार्थीबाट लिएको रकम फिर्ता हुनु पर्ने अडान राख्दै अभिभावक र विद्यार्थीसहित प्रशासनसँग छलफल गर्दा १५ प्रतिशत अतिरिक्त शुल्क लिएको, सर्टिफिकेटको नाममा पनि रकम लिएको पाइएको अनेरास्ववियु मोरङ अध्यक्ष तुलसी घिमिरेले जानकारी दिएका छन् । उनले कलेजले विद्यार्थीलाई १५ प्रतिशत छुट वापत दिने भनेको १५ सय कटाएर थप ६ हजार क्यारेक्टर सर्टिफिकेटको नाममा लिएको पाइएको बताएका छन् ।
मनपरी रकम असुलेको पाइएपछि विद्यार्थीले क्याम्पस प्रशासनलाई बढी लिएको रकम फिर्ता गर्न दबाब दिएका छन् ।
कलेजले विद्यार्थीबाट ७ हजार ५ सय मागेको पाइएको छ । छलफलमा क्याम्पसका लेखा प्रमुख रामेश्वर कामतले विद्यार्थीहरुबाट अतिरिक्त रकम लिएको स्वीकार गरेका थिए ।
विद्यार्थीले आन्दोलन गर्न थालेसँगै तीन बुँदे सहमति भएको छ । सहमति पत्रमा बिना शुल्क विद्यार्थीलाई क्यारेक्टर सर्टिफिकेट उपलब्ध गराउने, कोेरोनाको समय अवधिमा भएको अनलाइन क्लास बापतको १५ प्रतिशत छुट क्याम्पस प्रमुखसँग छलफल गरेर फिर्ता गर्ने उल्लेख छ ।
सहमतिमा क्याम्पसका तर्फबाट लेखा प्रमुख कामत, विद्यार्थीका तर्फबाट अनेरास्ववियुका मोरङ अध्यक्ष तुलसी घिमिरे तथा अभिभावकका तर्फबाट कमल रेग्मीले हस्ताक्षर गरेका छन् ।
