Nepal Times
Nepal Times
3
Shares

रुसको असल साथी बन्यो उत्तर कोरिया ,१ लाख सेना दिन तयार

रुसको असल साथी बन्यो उत्तर कोरिया ,१ लाख सेना दिन तयार

२३ साउन,एजेन्सी ।

युक्रेनसँगको युद्धमा लड्नका लागि रुसलाई एक लाख स्वयंसेवक लडाकु उत्तर कोरियाले सहयोग गर्ने भएको छ । रुसी सरकारी सञ्चारमाध्यमले उत्तर कोरियाले यस्तो प्रस्ताव गरेको जानकारी दिएको हो । अमेरिकाले उच्च क्षमताको रकेट प्रणाली युक्रेनलाई दिने निर्णय गरेसँगै रुसी सञ्चारमाध्यमले यस्तो समाचार प्रकाशित गरेका हुन् । समाचारमा उल्लेख गरिएअनुसार उत्तर कोरियाका एक लाख स्वयंसेवक युद्धमा भाग लिन तयार छन् ।

रुसी सञ्चारमाध्यममा उत्तर कोरियाको सेनाको पनि प्रशंसा गरिएको छ । रुसी सेनाबारे जानकार इगोर कोरोट्चेन्कोले उत्तर कोरियाले युक्रेनको फासीवादविरुद्ध लड्न चाहन्छ भने उसको प्रस्ताव स्वीकार गर्नुपर्ने बताएका छन् । उत्तर कोरियाले पठाउने फौज रुस समर्थक दोनेत्स्क जन गणतन्त्र (डीपीआर) र लुहान्स्क जनगणतन्त्र (एलपीआर)मा परिचालन गरिने जनाइएको छ । ती दुबै क्षेत्रलाई किमले स्वतन्त्र देशको रूपमा मान्यता दिएका छन् ।

‘उत्तर कोरिया आफ्ना १ लाख सेना दोनबास परिचालन गर्न तयार छ’ क्रेमलिन समर्थक एक न्युज एजेन्सीले लेखेको छ , ‘प्योङयाङले आफ्ना रणनीतिक युनिटलाई दोनबास लैजान सक्नेछ । त्यसको बदलामा उसलाई रुसले खाद्यान्न र उर्जा आपूर्ति गर्नेछ । उत्तरले सहयोग गरे रुसले सहर्ष स्वीकार्ने मस्कोले जनाएको छ । मस्कोका रक्षा विशेषज्ञ कर्नल इगोर कोरोत्चेन्कोले रुसी सरकारी टिभीलाई ‘किम जोङ उनले हामीलाई दिएको सहयोग स्वीकार्न लाज मान्नु नहुने बताएका छन् ।

अमेरिकाको न्युयोर्कस्थित काउन्सिल फर फरेन रिलेसन्सका अनुसार उत्तर कोरियाको सेना विश्वको चौथो ठूलो सेना हो । उत्तर कोरियामा सक्रिय सैनिकको संख्या करिब १३ लाख छ । थप ६ लाख रिजर्भ सैनिकको रुपमा रहेका छन् । यद्यपि उत्तर कोरियाले पुरानो हतियार र प्रविधिबाट काम चलाउँदै आएको विश्लेषकहरुको भनाइ छ ।

तर आणविक हतियारको मामिलामा भने उत्तर कोरिया शक्तिसम्पन्न राष्ट्रहरुको बराबरीमा छ । उत्तर कोरियाको प्रस्ताव वमोजिम रुसले प्रस्ताव सवीकार गरे युक्रेन युद्धले नयाँ मोड लिने विश्लेषण गरिएको छ । पछिल्लो समय उत्तर कोरिया र रुस अमेरिका तथा पश्चिमा मुलुकको प्रतिबन्धमा परेका दुई प्रमुख मुलुक हुन् ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.