२८ साउन,एजेन्सी ।
फ्रान्सेली क्लब पेरिस सेन्ट जर्मेन (पिएसजी) का स्टार फवार्डद्धय अर्जेन्टिनी लियोनेल मेस्सी र ब्राजिली स्टार नेयमार यस वर्षको बालोन डि’ओरको मनोनयनमै अटाएनन् । मेस्सी गत वर्षको बालोन डि’ओर विजेता हुन् । शुक्रबार राति जारी भएको ३० खेलाडीको मनोनयन सूचीमा सात पटकका विजेता मेसी नअटेका हुन् ।
यो सँगै विश्व फुटबलमा प्रसिद्ध मानिने पुरस्कार बालोन डि’ओरको पहिलो प्रारम्भीक सूचीमा मेसी सन् २००५ पछि पहिलो पटक प्रारम्भिक सूचीमा नपरेका हुन् । क्रिस्टियानो रोनाल्डो, रोबर्ट लेवान्डोस्की, किलियान एम्बाप्पे, करिम बेन्जेमा, एर्लिङ हालान्ड, मोहम्मद सलाह, साडियो माने, केभिन डे ब्रुएना, ह्यारी केन र सन ह्युङ मिन जस्ता खेलाडी भने सूचीमा अटाउँदा मेसीसँगै पेरिस सेन्ट जर्मेन पीएसजीकै अर्का खेलाडी नेयमार पनि सूचीमा अटाएनन् ।
गत सिजन इंग्लिस प्रिमियर लिग जितेको म्यानचेस्टर सिटी र दोस्रो भएको लिभरपुल तथा स्पेनी ला लिगा च्याम्पियन रियल मड्रिडका ६–६ खेलाडी ३० खेलाडी रहेको सूचीमा छानिएका छन् । यही सिजन सिटी गएका हालान्ड र डे ब्रुएनाबाहेक सिटीका फिल फोडन, जोआओ कान्सेलो, रियाद माहरेज र बर्नादो सिल्भा छन् । यस्तै लिभरपुलका सलाहसँगै भर्जिल भान डाइक, डार्विन नुनेज, लुइस डियाज, ट्रेन्ट अलेक्जान्डर आर्नोल्ड र फाबिन्हो छन् ।
रियलको टोलीको भने कप्तान बेन्जेमाले नेतृत्व गरेका छन् । सूचीमा परेका रियलका अरु खेलाडी कासेमिरो, थिबाउट कोर्टुवा, लुका मोड्रिच, भिनिसियस जुनियर र एन्टोनियो रुडिगर छन् । बाँकी खेलाडी भने आयाक्सका सेबेस्टियन हालेर, एसी मिलानका राफाएल लिआओ र माइक माइगान, आरबी लाइपजिगका क्रिस्टोफर एन्कुन्कु र युभेन्टका डुसान भ्लाहोभिच छन् । फ्रान्स म्यागजनिले दिने यो पुरस्कारको समारोह अक्टोबर १७ मा आयोजना गरिँदैछ ।
गत सिजन गरेको प्रदर्शनका आधारमा खेलाडीको सूची तयार पारिएको हो । च्याम्पियन्स लिगको प्रि–क्वाटरफाइनलमा स्पेनिस क्लब रियल म्याड्रिडसँग पराजित भएपछि नै मेस्सी बालोन डि’ओरको मनोनयनमै नपर्नुलाई प्रमुख कारकको रुपमा हेरिएको छ ।
