२५ असोज, काठमाण्डौ ।
आगामी ४ मंसिरमा हुने प्रदेश र प्रतिनिधिसभाको निर्वाचनमा नेकपा माओवादीको चुनाव चिन्हबाट चुनाव लड्ने निर्णय गरेको बाबुराम भट्टराई नेतृत्वको नेपाल समाजवादीले ६ सिट पाएको छ । जसमा दुई प्रतिनिधिसभा र चार प्रदेश सभा सदस्य छन् । नेपाल समाजवादी पार्टी माओवादी केन्द्रको चुनाव चिन्ह हँसिया हथौडा लिएर चुनावमा गएको छ ।
सत्तारुढ गठबन्धनले सिट बाँडफाँड गर्दा नेपाल समाजवादी पार्टीलाई सात सिट छुट्याएको र त्यो माओवादी कोटामा परेको छ । माओवादीले गठबन्धनमा पाएको प्रतिनिधिसभाको सिटमध्ये दुई बाबुरामको पार्टीलाई दिएको छ । जसमा महिन्द्र राय यादव सर्लाही–२ र मानुषी यमी भट्टराई काठमाडौँ ७ बाट उम्मेदवार बनेकी छन् ।
त्यस्तै प्रदेशतर्फ गंगानारायण श्रेष्ठ सिन्धुली २ (ख), फणिन्द्र देवकोटा गोरखा २ (क), चिनक कुर्मी नवलपरासी पश्चिम २ (क) र सुनिल साह सर्लाही २ (क) रहेका छन् । यी उम्मेदवार गठबन्धनका साझा उम्मेदवार हुन् । समानुपातिकतर्फ बाबुरामकी भाइबुहारी दुर्गादेवी न्यौपाने भट्टराई, ईश्वर रिजाल, उमरावतीदेवी यादव र दुर्गा सोव छन् ।
सोब र न्यौपाने आआफ्नो क्लस्टरको माथिल्लो नम्बरमा रहेकाले उनीहरु सांसद हुने लगभग निश्चित छ । यसपटक बाबुराम भने उम्मेदवार बनेका छैनन् । उनले जित्दै आएको गोरखा २ बाट यसपटक माओवादी केन्द्रका अध्यक्ष प्रचण्ड मैदानमा उत्रिएका छन् । बाबुरामले छोरी मानुषीकै लागि त्याग गरेको चर्चा चलेको छ, तर बाबुरामले त्यसलाई नकारेका छन् ।
यस्तै उनले आफूले प्रतिनिधित्व गर्दै आएको गोरखा–२ बाट यसपटक प्रचण्ड प्रत्यासी बन्ने निर्णयको आफूले अन्तर्हृदयैदेखि स्वागत गरेको बताएका छन् । मनोनयन दर्ता गर्न पनि उनी प्रचण्डसंगै गोरखा पुगेका थिए । यसअघि चितवन ३ बाट चुनाव लड्ने बताउँदै आएका प्रचण्ड भने चितवनमा पराजित हुन् सक्ने संशय र बाबुरामको चुनाव नलड्ने घोषणा पछि उनकै क्षेत्र गोरखा २ मा पुगेका छन् ।
