Nepal Times
Nepal Times
3
Shares

प्रधानमन्त्रीको उम्मेदवार छान्दै रविको पार्टी

प्रधानमन्त्रीको उम्मेदवार छान्दै रविको पार्टी

६ कात्तिक , काठमाण्डौ ।
आसन्न प्रतिनिधिसभाको निर्वाचन आउन अझै २८ दिन बाँकी रहेको अवस्थामा निर्वाचन अगावै राष्ट्रिय स्वतन्त्र पार्टीले संसदीय दलको नेताको निर्वाचन गर्ने भएको छ। रवि लामिछाने सभापति रहेको पार्टीले चुनावभन्दा अघि नै संसदीय दलको नेता चयन गर्न लागेको हो।

मंसिर ४ मा प्रतिनिधि सभा र प्रदेश सभा चुनाव हुँदैछ। स्वतन्त्र पार्टीले प्रदेश सभा चुनावका लागि उम्मेदवारी दिएको छैन। स्वतन्त्र पार्टीबाट प्रतिनिधि सभा चुनावका लागि भने प्रत्यक्षतर्फ र समानुपातिकतर्फ उम्मेदवारहरू छन्। अन्य पार्टीमा चुनाव भएपछि निर्वाचित सांसदमध्येबाट संसदीय दलको नेता चयन गर्ने गरिन्छ।

यो नेपालका राजनीतिक दलहरुका लागि अहिलेसम्म नभएको नौलो अभ्यास हो । तर स्वतन्त्र पार्टीको विधानमा भने चुनावअघि नै संसदीय दलको नेता चयन गर्ने व्यवस्था छ। सो व्यवस्था वमोजिम नै सो पार्टीले दलको नेता छान्ने भएको हो । यसरी छानिएको नेता नै प्रधानमन्त्रीको उम्मेदवार हुनेछ ।

उक्त व्यवस्थाअनुसार पार्टीका महामन्त्री मुकुल ढकालले आन्तरिक सर्कुलर गर्दै संसदीय दलको नेता उठ्न चाहनेलाई लिखित निवेदन दिन भनेका छन्। संसदीय दलको नेता उठ्न प्रतिनिधि सभाको प्रत्यक्षतर्फ र समानुपातिकतर्फका उम्मेदवारले पाउने व्यवस्था विधानको धारा ७२ को १ मा उल्लेख छ।

पार्टीका सम्पूर्ण साधारण सदस्यहरूले संसदीय दलको नेता चयनका लागि मतदान गर्न पाउँछन्। संसदीय दलको नेता उठ्न इच्छुकले भोलि सोमबार अपरान्ह [email protected]  मा लिखित निवेदन पठाउनुपर्ने हुन्छ।निर्वाचन कहिले गर्ने भन्ने टुंगिएको छैन। चुनावमा संसदीय दलको नेता चयन हुनका लागि खसेको कुल सदर मतको ५० प्रतिशतभन्दा बढी मत ल्याउनुपर्ने हुन्छ।

कसैले पनि ५० प्रतिशतभन्दा बढी मत नल्याए धेरै मत ल्याउने दुई उम्मेदवारबीच चुनाव गरेर धेरै मत ल्याउने व्यक्ति नै संसदीय दलको नेता हुने विधानको व्यवस्था छ। संसदीय दलको नेता चयन भएका व्यक्ति आमचुनावमा पराजित भएमा ऊ संसदीय दलको नेता बन्न भने पाउँदैन।

प्रतिनिधि सभा सांसद भएकामध्येबाट पछि पुनः संसदीय दलको नेता चयन गरिन्छ। संसदीय दलको नेता नै प्रधानमन्त्री हुने अवसर प्राप्त भएमा प्रधानमन्त्री हुने विधानमा उल्लेख छ। सो पार्टीका सभापति लामिछानेले भने चितवन २ बाट उम्मेदवारी दिएका छन् ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.