२१ कात्तिक, एजेन्सी ।
अन्तरिक्ष अनुशन्धानमा एकपछि अर्काे उयपलब्धि हासिल गर्दै आएको चीनले अब अन्तरिक्ष स्टेसनमा बाँदरहरू पठाउने भएको छ । शून्य गुरुत्वाकर्षण वातावरणमा उनीहरू कसरी प्रजनन् गर्छन् र हुर्कन्छन् भन्ने अध्ययन गर्न चीनले तियाङगङ अन्तरिक्षमा बाँदर पठाउन लागेको हो ।
वैज्ञानिक अनुसन्धानको नेतृत्व गर्ने चिनियाँ वैज्ञानिक झाङ लूलाई उद्धृत गर्दै साउथ चाइना मर्निङ पोस्टले उल्लेख गरेअनुसार यो प्रयोग अन्तरिक्ष स्टेसनको सबैभन्दा ठूलो मोड्युलमा गरिनेछ, जुन मुख्यतया जीवन विज्ञानमा प्रयोग गरिन्छ ।
माछा र शंखे किराजस्ता साना जीवहरूको अध्ययन गरेपछि ’अब मुसा र बाँदरहरू अन्तरिक्षमा कसरी हुर्कन्छन् वा प्रजनन् गर्छन् भन्ने बारे केही अध्ययनहरू गरिने’, झाङले बताए । उनी विश्वास गर्छन् कि यी प्रयोगहरूले सूक्ष्म गुरुत्वाकर्षण र अन्य अन्तरिक्ष वातावरणमा जीवको अनुकूलनको सुधार गर्न मद्दत गर्नेछ ।
तर, प्रतिवेदनअनुसार विज्ञहरूले मुसा र अन्य जीवजन्तुहरूमा यस्तो अध्ययन गर्न अझै धेरै कठिनाइहरू रहेको औंल्याएका छन् । अन्तरिक्षमा सबैभन्दा शक्तिशाली बन्ने दौडमा चीन रहेको छ । यसका लागि गत वर्ष चीनले तियानगङ् वा ’स्वर्गको दरबार’ नाम दिइएको अन्तरिक्ष स्टेसनको पहिलो खण्ड अन्तरिक्षमा पठाएको थियो ।
यो आउँदा दशकमा अन्तरिक्षमा शक्तिशाली बन्ने चीनको योजना अन्तर्गतको पछिल्लो कदम हो । तियानगङ्मा आफ्नै ऊर्जाको स्रोत, सञ्चालन प्रणाली, यात्रीलाई जीवित राख्ने प्रणाली र आवासीय खण्डहरू रहेका छन् ।
रुस र अमेरिकापछि चीन अन्तरिक्षमा स्टेसन र अन्तरिक्षयात्री राख्ने तेस्रो देश हो । सन् २०३१ पछि निष्क्रिय बनाइने अन्तर्राष्ट्रिय अन्तरिक्ष स्टेसन, आईएसएसलाई तियानगङ्ले प्रतिस्थापन गर्ने चीनको अपेक्षा छ ।
