२ मंसिर,काठमाण्डौ ।
काठमाडौंबाट पहाडी जिल्ला भोजपुरका लागि उडान भरेको नेपाल वायुसेवा निगमको ट्वीनअटर काठमाडौं नै फर्किएको छ । फ्लाइट कन्ट्रोल सिस्टममा देखिएको समस्याका कारण जहाज भाइब्रेसन (थर्किने) हुन थालेपछि भोजपुरतर्फ उडिरहेको ट्वीनअटर काठमाडौं नै फर्किएको हो ।
१५ यात्रु बोकेर उडिरहेको निगमको अल्फा ब्राभो युनिफर्म टुइनअटर टेकअफ भए लगत्तै समस्या देखिएपछि काठमाडौं नै फर्किएको वायुसेवा स्रोतले जनाएको छ । सोही विमानबाट भोजपुर जाने तयारीमा रहेका उत्तम कार्कीले भोजपुर उडेको जहाज प्राविधिक गडबढीले पुन काठमाडौं फर्किएको बताएका छन् ।
विहान करिब ५.३० काठमाडौं एअरपोर्ट आएर ७ बजे भोजपुर उडेको नेपाल एयरलायन्सकोे जहाज ७.१५ मा टेक्निकल भएर पुन ः काठमाडौ फर्किएको उनले बताएका छन् । विमान यसरी काठमाडौं फर्किएपनि विमानसेवाले अर्काे विकल्प नदिदा ३ घन्टा एअरपोर्ट बसेर आफू तुम्लिङटार हुँदै भोजपुर आएको उनले बताएका छन् ।
उक्त विमानमा भोजपुरबाट काठमाडौं फर्किने १० यात्रु थिए । निगमको त्यो विमान ग्राउडेड भएपछि अर्को विमान नहुँदा दुवै तर्फका यात्रु अलपत्र परेका छन् । उक्त ट्वीनअटरले भोजपुरपछि फाप्लु र दाङ उडान गर्ने तालिका थियो । यी दुई गन्तव्यका यात्रु पनि अलपत्र परेका छन् ।
