Nepal Times
Nepal Times
216
Shares

सुरु भयो एमसीसी परियोजना,३१५ किमि प्रसारणलाइन निर्माणका ठेक्का आह्वान

सुरु भयो एमसीसी परियोजना,३१५ किमि प्रसारणलाइन निर्माणका ठेक्का आह्वान

१२ मंसिर, काठमाण्डौ ।
नेपालमा अमेरिकी सहयोग सम्झौता एमसीसी परियोजना अन्तर्गतको विद्युत प्रसारणलाइन निर्माण सुरु हुने भएको छ । मिलेनियम च्यालेन्ज एकाउण्ट नेपाल (एमसीए–नेपाल) ले उक्त काम सुरु गर्ने भएको छ । विद्युत प्रसारणलाइन निर्माणका लागि ठेक्का निकालेर परियोजनाको काम सुरु गर्न लागेको हो ।

एमसीए नेपालले सोमबार लप्सीफेदी–रातमाटे–बुटवल प्रसारणलाइन निर्माणका लागि तीनवटा लटमा ठेक्का निकालेको छ । लप्सीफेदी–रातमाटे–न्यु हेटौंडा पहिलो लट (११७ किमि), दोस्रो लटमा रातमाटे–न्यु दमौली (९० किमि) र तेस्रो लटमा न्यु दमौली–न्यु बुटवल, न्यु बुटवलबाट भारतीय सीमासम्म (१०८ किमि) गरी कुल ३१५ किलोमिटर रहेका छन् ।

इच्छुक कम्पनीले २७ मार्चसम्म आवेदन दिन सक्नेछन् । यो ठेक्का पाउने कम्पनीले डिजाइन,सप्लाई, डेलिभरी, इन्स्टलेसन, टेष्टिङ, कमिसनिङ गर्नु पर्नेछ । आयोजनाको सम्भाव्यता अध्ययन प्रतिवेदन भने एमसीए–नेपालले उपलब्ध गराउनेछ । जुन तयार भइसकेको छ ।

यो आयोजना ५ वर्षमा निर्माण सम्पन्न गर्नु पर्नेछ । सन् २०२३ को अगष्टबाट निर्माणको काम सुरु गर्ने कार्यतालिका छ भने परियोजनाका सबै काम २०२८ अगष्टमा सक्नुपर्नेछ । निर्माण कम्पनीले डिजाइनसहित साढे तीन वर्षको अवधि पाउनेछ ।

बीचमा कुनै समस्या आए समाधानका लागि थप समय छुट्याइएको एमसीए–नेपालका अधिकारीले बताएका छन् । अधिकारीहरुका अनुसार यो आयोजना समयमा नै सम्पन्न हुनेछ । यदि नसक्ने अवस्था आयो पैसा फिर्ता जान्छ । प्रस्तावित आयोजनामा कुल ८५६ वटा टावर निर्माण हुनेछन् । टावर निर्माणका क्रममा २ लाख १२ हजार रुखहरु काट्नुपर्छ । स

रकारी र निजी गरी ८ सय रोपनी जग्गा चाहिने अनुमान गरिएको छ । अहिले रुख कटानको स्वीकृति र अधिग्रहणको प्रक्रिया अघि बढेको छ । यो प्रसारणलाइन काठमाडौं–सिन्धुपाल्चोक– नुवाकोट– धादिङ– मकवानपुर–चितवन–तनहुँ– पाल्पा–नवलपुर–परासी हुँदै जानेछ ।

४०० केभीको डबल सर्किट यो प्रसारणलाइनले ३००० मेगावाटसम्म विद्युत वहन गर्न सक्छ । निर्माणपछि अहिले संचालनमा रहेको ढल्केबर–मुजफ्फरपुर पछिको दोस्रो अन्तर्देशीय प्रसारणलाइन हुनेछ । नेपाल–भारत विद्युत व्यापारको आयतन बढाउन यो प्रसारणलाइन महत्वपूर्ण हुने अपेक्षा छ ।

आयोजनामा बोटेक जेभीले परामर्शदाताका रुपमा काम गरिरहेको छ । अहिले प्रसारणलाइनको विस्तृत सम्भाव्यता अध्ययन, एलाइन्टमेन्ट सर्भे, विवाद आएका ठाउँमा वार्ता गरेर रि–सर्भे गर्ने लगायतका कामहरु अन्तिम चरणमा चलेको आयोजनाका अधिकारीहरुले बताएका छन् ।

२९ अर्ब ६४ करोड प्रसारणलाइन र १४ अर्ब ८२ करोड सवस्टेसनका लागि खर्च हुने एमसीए–नेपालले जनाएको छ । पहिलो चरणमा प्रसारणलाइनको लागि ठेक्का निकालिएको हो । दोस्रो चरणमा सवस्टेसनका लागि पनि ठेक्का निकाल्ने तयारी छ ।

करिब एक महिनाभित्र दोस्रो चरणमा निकालिने छ । यो प्रसारणलाइनका लागि रातमाटे, दमौली र बुटवल गरी तीनवटा सवस्टेसन निर्माण गरिनेछ । दमौली र बुटवलको प्रसारणलाइनका लागि नेपाल विद्युत प्राधिकरणले जग्गा अधिग्रहण गरिसकेको छ ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.