१५ मंसिर,काठमाण्डौ ।
मंसिर ४ गते सम्पन्न प्रतिनिधि सभा निर्वाचन अन्तर्गत देशभरको समानुपातिकतर्फको मतगणना जारी छ। बिहीबार बेलुका सम्म १ करोड ३ लाख ४६ हजार ८१७ मत गणना भइसकेको छ। जारी मतगणनामा एमालेले सबैभन्दा बढी २७ लाख ६१ हजार ६४८ मत पाइसकेको छ।
त्यस्तै, कांग्रेसले २६ लाख ६० हजार ७८३, माओवादी केन्द्रले ११ लाख ६० हजार ७८३, राष्ट्रिय स्वतन्त्र पार्टीले ११ लाख १४ हजार २५८, राष्ट्रिय प्रजातन्त्र पार्टीले ५ लाख ८४ हजार ९६९ र जसपाले ४ लाख २० हजार ७५० मत पाइसकेको छ। प्रतिनिधि सभामा प्रत्यक्षतर्फ १० सिट जितेको एकीकृत समाजवादीले समानुपातिकतर्फ न्युन मत पाएको देखिन्छ।
सदर मतको ३ प्रतिशत अर्थात् थ्रेस होल्ड कटाउन पनि मुस्किल पर्ने देखिएको सो दलले बिहीबार बेलुकासम्म २ लाख ९३ हजार ९०५ मत पाएको देखिन्छ। प्रत्यक्षतर्फ र समानुपातिकतर्फ एकीकृत समाजवादीको मत अनुपातमा निकै अन्तर देखिन्छ। प्रत्यक्षतर्फ सो पार्टीका १० उम्मेदवारले जित निकालेका छन्। उनीहरु सबैले सत्ता गठबन्धनको सहयोगमा निर्वाचन जितेका हुन्।
त्यस्तै, गठबन्धन र एकल रुपमा प्रतिस्पर्धामा होमिएका उसका ११ उम्मेदवार पराजित भए। पराजित भएका ११ उम्मेदवारहरुले पाएको कुल मत १ लाख ६९ हजार ११० छ। यसरी एकीकृत समाजवादीका २१ उम्मेदवारले प्रत्यक्षतर्फ पाएको मत ४ लाख ३६ हजार २० छ। तर, विजेता र पराजित उम्मेदवारहरुकै क्षेत्रमा एकीकृत समाजवादीको समानुपातिकतर्फ भने न्युन मत पाएको देखिन्छ।
एकीकृत समाजवादीका विजयी १० उम्मेदवारको क्षेत्रमा ४४ हजार ६०३ मत खसेको देखिन्छ। पराजित ११ उम्मेदवारको क्षेत्रमा ३२ हजार १९५ मत खसेको छ। यसरी अहिलेसम्म ती २१ उम्मेदवारको क्षेत्रमा एकीकृत समाजवादीले पाएको समानुपातिक मत ७६ हजार ७९८ छ।
जबकि, यिनै क्षेत्रमा प्रत्यक्ष उम्मेदवारले पाएको मत ४ लाख ३६ हजार २० छ।आफ्ना २१ उम्मेदवारले आफ्नो क्षेत्रमा पाएको कुल मत जति छ, एकीकृत समाजवादीले देशभरबाट समानुपातिकतर्फ त्यति मत पनि पाउन सकेको छैन। यस्तै नेकपा एसले समानुपातिकमा प्रतिनिधिसभातर्फ भन्दा प्रदेशसभामा धेरै मत पाएको छ ।
प्रतिनिधिसभामा थ्रेसहोल्ड कटाउन बल गरिरहँदा तुलनात्मकरूपमा प्रदेशसभामा धेरै मत ल्याएको हो । एसले प्रदेश समानुपातिकतर्फ ३ लाख ६६ हजार ९५२ मत ल्याएको हो । प्रदेश समानुपातिक मतलाई हेर्दा नेकपा एसले मधेस प्रदेशमा सबैभन्दा धेरै मत ल्याएको छ भने गण्डकीमा कमजोर देखिएको छ । राष्ट्रिय दल बन्न प्रत्यक्षतर्फ एक सिट र समानुपातिकमा थ्रेस होल्ड कटाउनुपर्ने व्यवस्था छ । निर्वाचनमा १ करोड ७९ लाख ८८ हजार पाँच सय ७० मतदाता थिए ।
जसमध्ये ६१ प्रतिशत अर्थात् करिब १ करोड नौ लाख मत खसेको निर्वाचन आयोगले जनाएको छ। यसरी हेर्दा समाजवादीले थ्रेस होल्ड कटाउन अझै १० हजारको हाराहारीमा मत ल्याउनुपर्ने देखिन्छ । अब बाजुरा, स्याङ्जा र दोलखाको अन्तिम मतपरिणाम आउन बाँकी छ । नेकपा एमाले,नेपाली कांग्रेस,माओवादी केन्द्र,राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनता समाजवादी पार्टी र जनमत पार्टीले थ्रेस होल्ड कटाएका छन्।
