८ पौष, काठमाण्डौ ।
स्वास्थ्य तथा जनसंख्या मन्त्रालयले कोरोना संक्रमणको जोखिम रहेकोले मास्क प्रयोग गर्न आग्रह गरेको छ। मन्त्रालयका सहप्रवक्ता डा. समिरकुमार अधिकारीले फरक स्वरूपमा कोरोना संक्रमणको जोखिम देखिएकोले पछिल्लो अवस्थालाई मध्यनजर गर्दै सबैमा मास्कको प्रयोग गर्न आग्रह गर्दै विज्ञप्ति निकालेका छन्।
‘मास्क प्रयोग गर्नु हुन, एक अर्कामा भौतिक रूपमा दुरी कायम राख्नु हुन र व्यक्तिगत सरसफाइमा ध्यान दिनु हुन हार्दिक अनुरोध गर्दछौं,’ मन्त्रालयले निकालेको विज्ञप्तिमा उल्लेख छ। चीन र भारतमा पछिल्लो समय कोरोना संक्रमण फैलिइरहेको छ। पछिल्लो समय नेपालमा ओमिक्रोन भेरियन्टका संक्रमित मात्रै फेला परेका छन्।
छिमेकी मुलुकहरूमा देखिएको बिएफ ७ भने नेपालमा पुष्टि नभएको मन्त्रालयको भनाइ छ। जोखिमकै बीच भारतको राजधानी नयाँ दिल्लीमा पुनः मास्क अनिवार्य गरिएको छ । दुई महिनाअघि मास्क लगाउनुपर्ने नियम हटाइएकोमा चीन लगायतका देशहरूमा कोरोना संक्रमण उच्च भएपछि पुनः मास्क लगाउने नियम लगाइएको हो ।
प्रधानमन्त्री नरेन्द्र मोदीको अध्यक्षतमा बिहिबार बसेको उच्च स्तरीय आकस्मिक बैठकले सार्वजनिक स्थानमा मास्क नलगाए जरिवाना समेत गर्ने निर्णय गरेको हो । केन्द्र सरकार र राज्य सरकारहरुले सर्वसाधारणलाई सतर्कता अपनाउन समेत आह्वान गरेका छन् । भारत सरकारले गत बुधबारदेखि देशभरका विमानस्थलमा विदेशबाट आउने यात्रुहरूको कोरोना परीक्षण गर्न सुरू गरिसकेको छ ।
पछिल्लो समय चीन, जापान, दक्षिण कोरिया, अमेरिका र फ्रान्स लगायतका देशमा कोरोन संक्रमण तीव्र रूपमा बढिरहेको छ । चीनका अस्पतालहरु कोरोना संक्रमितले भरिएका छन् । सरकारले तथ्यांक लुकाए पनि सामाजिक सञ्जालमा आएका भिडियो र तस्विरले वास्तविकता देखाएको छ ।
चीनको वर्तमान स्वास्थ्य संकटको गम्भीरता एक डरलाग्दो भाइरल भिडियोबाट अनुमान गर्न सकिन्छ। भिडियोमा ह्वीलचेयरमा बसेका केही बिरामी मृतकको शवबाट केही फिट टाढा देखिएका छन् । चीनको राजधानी बेइजिङको एक अस्पतालमा एक बिरामीले केही दिन अघि यो भिडियो रेकर्ड गरेका थिए जसमा केही शव भुइँमा छरिएको देखिन्छ।
अस्पतालमा पनि बिरामीको भीड देखिन्छ । चीनले अहिलेसम्मकै सबैभन्दा खराब कोरोना लहरको सामना गरिरहेको आशंकाका बीच यस्ता भिडियोहरू बाहिर आइरहेका छन् । करिब दुई साताअघि सरकारले शून्य कोभिड नीति खुकुलो बनाएपछि अवस्था बिग्रन थालेको छ । अधिकांश पश्चिमी देशहरूको तुलनामा चीनको खोप दर निकै कम छ।
जसका कारण विज्ञहरूले देशका १० लाखभन्दा बढी मानिसले कोरोनाबाट ज्यान गुमाउन सक्ने चेतावनी दिएका छन् । चिनियाँ सामाजिक सञ्जालमा भाइरल भइरहेको एउटा छोटो क्लिपले देशको दयनीय स्वास्थ्य प्रणाली देखाउँछ।
उक्त भिडियो केही दिनअघि बेइजिङ चुइयाङ्लु अस्पतालमा रेकर्ड गरिएको थियो जहाँ कोभिड र सामान्य बिरामी दुवैको उपचार भइरहेको थियो। फुटेजमा मास्क लगाएका एक बिरामी सेतो कपडाले बेरिएको शवको छेउमा ह्वीलचेयरमा बसेको देखिन्छ। नजिकैको ओछ्यानमा अर्को शव देख्न सकिन्छ भने अन्य शव अस्पतालको वार्डको भुइँमा छरिएका छन् ।
