Nepal Times
Nepal Times
918
Shares

प्रचण्ड नेतृत्वमा ८ सदस्यीय मन्त्रिपरिषद् गठन

प्रचण्ड नेतृत्वमा ८ सदस्यीय मन्त्रिपरिषद् गठन

११ पौष, काठमाण्डौ ।
नव नियुक्त प्रधानमन्त्री पुष्पकमल दाहाल ‘प्रचण्ड’ले पद तथा गोपनीयताको शपथ लिएका छन् । राष्ट्रपति निवास शितल निवासमा सोमबार दिउँसो प्रचण्डले राष्ट्रपति विद्यादेवी भण्डारीबाट शपथ लिएका हुन् । शपथ ग्रहण समारोहमा प्रचण्ड दौरा सुरूवालमा सजिएका थिए ।

उनले पहिलो पटक दौरा सुरूवाल लगाका हुन् । यसभन्दा अघि २ पटक प्रधानमन्त्रीको शपथ लिँदा प्रचण्डले भादगाउँले टोपीसहित कोट–पेन्टमा थिए । प्रचण्ड नेतृत्वको सरकारमा तीन जना उपप्रधानमन्त्री नियुक्त भएका छन् । एमालेको तर्फबाट विष्णु पौडेल उपप्रधानसहित अर्थमन्त्रीमा शपथ लिएका छन् ।

माओवादी केन्द्रका वरिष्ठ उपाध्यक्ष नारायणकाजी श्रेष्ठ उपप्रधानसहित भौतिक पूर्वाधार तथा यातायात मन्त्री र राष्ट्रिय स्वतन्त्र पार्टीका सभापति रवि लामिछाने उपप्रधानमन्त्रीसहित गृहमन्त्रीमा शपथ लिएका छन् । यस्तै एमालेबाट ज्वालाकुमारी साह, दामोदर भण्डारी र राजेन्द्र राई पनि मन्त्री बनेका छन् ।

जनमत पार्टीबाट अब्दुल खान मन्त्रीमा नियुक्त भएका छन् । उनीहरूको जिम्मेवारी पछि तोकिनेछ । योसंगै दाहालको नेतृत्वमा ८ सदस्यीय मन्त्रिपरिषद् गठन भएको हो । शपथ ग्रहण समारोहमा निवर्तमान प्रधानमन्त्री शेरबहादुर देउवा, पूर्वप्रधानमन्त्रीहरू केपी शर्मा ओली, माधवकुमार नेपाल, बाबुराम भट्टराईहरू उपस्थित थिए ।

त्यस्तै पूर्वमन्त्रीहरू तथा कूटनीतिक नियोगका प्रमुखहरू पनि शपथ ग्रहण समारोहमा उपस्थित थिए । कार्यक्रममा पूर्वप्रधानमन्त्री केपी शर्मा ओली र माधवकुमार नेपाल सँगसँगै बसेका थिए । २०७७ सालमा नेकपा विभाजन भएपछि ओली र नेपाल सँगसँगै देखिएका थिएनन् ।

माधव नेपालले एमाले विभाजन गरेर नेकपा एकीकृत समाजवादी पार्टी गठन गरेदेखि दुई जना नेताबीच बोली बाराबार र गालीगलौज नै चलेको थियो । आज भने उनीहरु संगै देखिएका हुन् । माधव नेपाल नेतृत्वको एकीकृत समाजवादी प्रचण्ड नेतृत्वको सरकारमा सहभागि भएको छैन ।

तर भविष्यमा एजेण्डा मिल्दा सहकार्य गर्न सकिने नेकपा एसका नेताहरुले बताएका छन् । यद्यपी प्रचण्ड एमालेसहितको नयाँ गठबन्धन गएपछि भने पार्टीको बैठकमा व्रिफिङ गर्दै माधव नेपालले प्रचण्डले धोका दिएको बताएका थिए ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.