२६ माघ, एजेन्सी ।
फिफाले प्रदान गर्ने उत्कृष्ट गोलकिपरका लागि प्रमुख तीन जना प्रतिस्पर्धी छानिएका छन् । विश्वकप विजेता इमिलियानो मार्टिनेजलाई फिफाले प्रदान गर्ने उत्कृष्ट गोलकिपर अवार्डमा थिबाउट कोर्टुवा र यासिन बोनोले चुनौती प्रस्तुत गर्ने भएका छन् । फिफाको गोलकिपर अवार्डका लागि पाँच गोलकिपर मनोनयनमा परेका थिए ।
जसमा सन् २०२१ को अगस्टदेखि २०२२ को डिसेम्बरसम्ममा गरेको उत्कृष्ट प्रदर्शन गरेका गोलकिपर समेटिएका थिए । तर, समर्थक खेलाडी, टिमका प्रशिक्षक र कप्तानहरुबाट आएको भोटप्रति ब्राजिलका एलिसन बेकर र एन्डरसन बाहिरिएपछि मार्टिनेज, बेल्जियमका कोर्टुवा र मोरोक्कोका बोनो शीर्ष तीनभित्र रहन सफल भएका हुन् ।
अर्जेन्टिनाले कतार विश्वकपको उपाधि जित्दा मार्टिनेजले ‘गोल्डेन ग्लोभ्स्’ जितेका थिए । फाइनलमा फ्रान्सविरुद्ध मार्टिनेजले अतिरिक्त समयको इन्जुरी टाइममा र्यान्डल कोलो मुआनीको उत्कृष्ट प्रहार र पेनाल्टी सुटआउटमा एक प्रहार जोगाउँदै अर्जेन्टिनालाई विश्वकपको उपाधि जिताउँन सहयोग गरेका थिए । बोनो पनि कतार विश्वकपछि नै समर्थकमाझ चर्चाको पात्र बनेका थिए ।
मोरोक्को अफ्रिका महादेशबाट पहिलो पटक विश्वकपको सेमिफाइनलमा पुग्ने टिम बन्दा उनको साधारण प्रदर्शनको साथ पाएको थियो । उनी अर्जेन्टिनी गोलकिपर मार्टिनेजसँगै सर्वाधिक तीन खेलमा ‘क्लिन सिट’ राख्ने गोलकिपर बनेका थिए । बेल्जियमका कोर्टुवाले रियाल मड्रिडले च्याम्पियन्स लिगको उपाधि जित्दा ५९ सेभ र पाँच खेलमा ‘क्लिन सिट’ राखेका थिए । कोर्टुवाले फाइनलमा मात्र लिभरपुलविरुद्ध नौ सेभ गरेका थिए ।
