१४ फागुन, काठमाण्डौ ।
काठमाडौं महानगरपालिकाका मेयर बालेन शाहले आफूलाई मेयर पदबाट राजीनामा दिन लगाउन खोजेको भन्दै शनिबार सामाजिक सञ्जाल फेसबुकमा एक स्ट्याटस लेखेपछि उनको स्टाटसको विभिन्न कोणबाट विश्लेषण गरिएको छ । उनले लेखेका थिए, ’मेयरको पोजिसनबाट मलाई आज राजीनामा दिन लाउन खोज्दै छन्। यो देश कहिले पनि बन्दैन।’
केन्द्रीय सरकारले नै बालेनलाई काम गर्न असहयोग गरी मेयर पदबाट राजीनामा दिन बाध्य पार्न खोजिएको बालेनको सचिवालयका सदस्य कुमार व्यञ्जनकारले बताएका छन । उनका अनुसार बालेनले २०–२५ दिनदेखि नेपाल सरकारसँग चार–पाँच वटा कुरामा सहकार्य गर्न खोजिरहेका छन्।तर सरकारले कुनै पनि चासो व्यक्त नगरेको उनको भनाइ छ।
’गृह मन्त्रालयसँग मेयरका लागि सुरक्षा चाहियो भनेर माग गरेका थियौं। त्यसबारे अहिलेसम्म कुनै पनि कुरा आएको छैन,’ व्यञ्जनकारले भने, ’उहाँले प्रधानमन्त्रीसँग भेटेर कुरा गर्न पनि खोज्नुभयो। तर कुनै पनि जवाफ आउँदैन।’ गृह सचिवलाई भन्दा गृह मन्त्रीलाई भन्नु पर्ने र गृह मन्त्रीलाई भन्दा प्रधानमन्त्रीलाई भन्नुपर्ने भन्दै काम नगरेको उनको भनाइ छ।
’अहिले प्रधानमन्त्री नै गृहमन्त्री हुनुहुन्छ। कुनै पनि कल र म्यासेजको रेस्पोन्स पनि दिनु हुँदैन,’ उनले भने, ’गृह सचिवलाई काम गर्ने अधिकार नै दिनु हुँदैन। स्थानीय सरकारले सहयोग माग्ने भनेको केन्द्र सरकारमा हो तर केन्द्र सरकारले नै सहयोग नगरेपछि त यो काम नगर भनेर राजीनामा दे भनेर बाध्य पारिएको त हो नि!’ काठमाडौंको मेयर जस्तो मान्छेले आफूलाई सुरक्षा चाहियो भन्दा नदिएपछि आक्रोशमा उक्त स्ट्याटस लेखिएको व्यञ्जनकारले बताए।
जिल्ला प्रशासन कार्यालय काठमाडौंमा निवेदन दिँदै बालेनले पुस २९ गते सुरक्षाकर्मी माग गरेका थिए। काठमाडौंका प्रमुख जिल्ला अधिकारी घनश्याम उपाध्यायले निवेदन गृह मन्त्रालयको शान्ति सुरक्षा महाशाखामा पठाएको बताएका थिए। मंसिर १२ गते थापाथलीको सुकुम्बासी बस्ती हटाउने क्रममा महानगरीय प्रहरीमाथि ढुंगामुढा गर्ने र बालेनलाई ज्यान मार्ने धम्की दिने ६ जनाविरूद्ध किटानी जाहेरी दर्ता गरेको थियो।
किटानी जाहेरीमा १ महिलासहित ५ जना पुरूष रहेका छन्। प्रहरीमा किटानी जाहेरी दिँदा पनि ती व्यक्तिहरूलाई नपक्रिएको उनी बताउँछन्। मनोहरा आयोजनामा बाँधिएको बाँध जाहेरी दिएकै मानिसको समूहले डोजर चलाई भत्काएको व्यञ्जनकारले बताए। राज्यको समान्य नागरिकले पनि असुरक्षित भएको गुनासो गरेपछि उसलाई पूर्ण सुरक्षाको प्रत्याभूति गर्नु राज्यको कर्तव्य हो ।
जनताको सुरक्षाकै लागि त सेना शसस्त्र तथा नेपाल प्रहरी र राष्ट्रिय अनुशन्त्रान आयोग लगायतका सुरक्षा संयन्त्र गरेका छन् । तर जनताको प्रतिनिधिले नै आफू असुरक्षित भए भन्दै सुरक्षा माग गरेको अवस्थामा उसलाई सुरक्षाको पूर्ण प्रत्याभूति गर्नुको साटो उसलाई थप असुरक्षित बनाएको अनुभूति गराउने वातावरण किन र कसले गरेको होला ? महानगरका मेयर र उपमेयरको सुरक्षा नगर रक्षकहरुले गर्दै आएको देखिन्छ।
यसैले उनीहरुले थप सुरक्षा नपाउन हुन् कि ? यदि मेयर बालेन सुरक्षित नै छन् र उनलाई सुरक्षाको त्यस्तो कुनै जोखिम नै रहेको छैन् भने जिल्ला प्रशासन, केन्द्र सरकार, गृहमन्त्रालय तथा गृहमन्त्रीले त्यस्तो जानकारी उनलाई किन नदिएका होलान् ? यी उनको स्टाटस पछि अनुत्तरित रहेका प्रश्नहरु हुन् । बालेनले राजीनामा मागेको बारे स्टाटस लेखेपछि यो उनको स्टाटसमा कमेन्ट मात्रै २१ ह्जार भन्दा बढी आएको छ भने झन्डै ९ हजार त शेयर भएको छ ।
उनको यो स्टाटस आएपछि बालेन जस्तै स्वतन्त्र रुपमा उम्मेदवार बनेर धरान उपमहानगरपालिकाको मेयरमा निर्वाचित भएका मेयर हर्क साम्पाङले पनि स्टाटस लेखेका छन् उनले भनेका छन् , भात खान नपाएकाहरुलाई दुई चार पैसा दिनुस् तर देश लुट्न नपाएकाहरुले राजीनामा माग्छन् भने सुँघाइ दिनुस् , बालेन जी !
