Nepal Times
Nepal Times
3
Shares

माधव प्रधानमन्त्री बन्ने कुरा बाबुरामलाई मन परेन

माधव प्रधानमन्त्री बन्ने कुरा बाबुरामलाई मन परेन

१५ फागुन, काठमाण्डौ ।
७ दलीय गठबन्धनमा नरहेपनि त्यसलाई भत्काउदै नयाँ बनेको ८ दलीय समीकरणप्रति नेपाल समाजवादी पार्टीका अध्यक्ष तथा पूर्वप्रधानमन्त्री डा. बाबुराम भट्टराईले असन्तुष्टि ब्यक्त गरेका छन् । आठदलीय गठबन्धन र भागबन्डाका लागि गरिएको सहमतिप्रति उनले टिप्पणी गरेका छन् ।

भट्टराईले ट्वीटमार्फत आठ दलले आलोपालोमा माधव नेपाललाई प्रधानमन्त्री छुट्याएकोतर्फ पनि व्यंग्य गरेका छन् । ‘दलीय भागबन्डा गर्दा १० सीटवाला पार्टीलाई ६६ दिन पर्दोरहेछ ! त्यसैमा राष्ट्रिय सहमति गर्ने हो त ?’, बाबुरामले लेखेका छन् । उनले प्रतिनिधिसभाका सबै सदस्यलाई ५ वर्षको कार्यकालमा पालैपालो प्रधानमन्त्री बनाउँदाको हिसाबसमेत पेस गरेका छन् ।

बाबुरामले लेखेका छन्, ‘२७५ जना प्रतिनिधिसभा सदस्यलाई पाँच वर्षको संसदको पूरै कार्यकालमा पालैपालो प्रम बनाउदा एउटाको भागमा ६ दिन १४ घण्टा २४ मिनेट पर्दो रहेछ ! दलीय भागबण्डा गर्दा १० सीटवाला पार्टीलाई ६६ दिन पर्दो रहेछ ! त्यसैमा राष्ट्रिय सहमति गर्ने हो त ? सुशासन र समृद्धिको पहिलो शर्त राजनीतिक स्थिरता हैन ?’ यसअघि गएराति भट्टराईले जनसरोकारका मुद्दा ओझेलमा पर्दै गएको भन्दै अहिलेको आठदलीय गठबन्धनप्रति असन्तुष्टि जनाउँदै सामाजिक सञ्जालबाट अभिव्यक्ति सार्वजनिक गरेका थिए ।

भागबन्डाकै लागिमात्र गठबन्धन र सरकार परिवर्तन भएको उनको टिप्पणी छ । चुनावको तीन महिनामै दुईवटा गठबन्धन र सरकार परिवर्तन भएकोतर्फ ईंगित गर्दै भट्टराईले विचार, नीति, कार्यक्रमको कुनै तादम्यता नमिलेको समेत बताएका छन् ।

‘आमनिर्वाचनको तीन महिनाभित्र दुई गठबन्धन र सरकार परिवर्तन ! गठबन्धनमा विचार, नीति, कार्यक्रमको कुनै तादात्म्य नास्ति !दल र नेताहरूको निम्ति राजकीय पदको भागबन्डा मुख्य मुद्दा ! संसदको एउटा कार्यकालका लागि तीन प्रमको अग्रिम बाँडफाँट ! जनसरोकारका मुद्दा नास्ति ! यही हो लोकतन्त्र ? हामी कता जादैछौं ?’ यसअघि मंसिर ४ को निर्वाचनमा पनि पूर्वप्रधानमन्त्रीहरु अझै प्रधानमन्त्री बन्ने रहरले चुनावमा होमिएको बताउँदै उनले आफूलाई चुनावी प्रतिस्पर्धाबाट अलग गरेका थिए ।

आफूले उम्मेदवारी दिदै आएको गोरखामा उनले माओवादी केन्द्रका अध्यक्ष पुष्पकमल दाहाल प्रचण्डलाई सहयोग गरेका थिए । नेपाल समाजवादीले माओवादीसँग कार्यगत एकता गरिरहेको छ । मंसिरको चुनावमा पनि माओवादीकै चुनाव चिन्हबाट समाजवादीका केही नेता उम्मेदवार बनेका थिए । जसमा महेन्द्र राय यादव विजयी भएका छन् । तर पछिल्लो समय बाबुरामको नामपनि राष्ट्रपतिका लागि चर्चामा आएपनि माओवादीबाट आवश्यक सहयोग नभएको समाजवादीका नेताहरुले बताउदै आएका छन् ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.