१८ फागुन, काठमाण्डौ ।
आठ दलीय गठबन्धनमा रहेको सिके राउत नेतृत्वको जनमत पार्टीले उपप्रधानसहित दुई मन्त्रालयको माग गरेको छ । राष्ट्रपतिमा रामचन्द्र पौडेललाई समर्थन गर्ने ८ दलले सांसदलाई प्रशिक्षण कार्यक्रममा सहभागी हुन पुगेका खानेपानीमन्त्री अब्दुल खानले आफूहरुले उपप्रधानसहित दुई मन्त्रालय पाउने दाबी गरे । उनले भने, ‘गठबन्धनमा हामीले दुई मन्त्रालय पाउँछौं।
उपप्रधानसहित उहाँहरुले पहिलाजस्तो झुक्याउनुहुन्न । अहिले उहाँहरु इमान्दारी राजनीतिमा आउनुभएको छ।’ उनले उपप्रधानमन्त्रीमा पार्टी अध्यक्ष डा. सिके राउत जाने सम्भावना रहेको बताए । यसअघि सात दलीय गठबन्धनमा उद्योग मन्त्रालय मागेपनि खानेपानी मन्त्रालय दिएपछि लामो समयपछि मात्रै स्वकारेको थियो ।
आज नेपाली कांग्रेस नेतृत्वको आठदलीय गठबन्धनले सांसदहरूलाई प्रशिक्षण दिएको छ । आसन्न राष्ट्रपति चुनावमा गठबन्धनका उम्मेदवार रामचन्द्र पौडेललाई राष्ट्रपतिमा विजयी गराउने संकल्पसहित प्रशिक्षण कार्यक्रम राखिएको हो ।
गठबन्धनका दलहरूले यसअघि राष्ट्रपति निर्वाचन अभियान परिचालन र संयोजन संयन्त्रसमेत बनाइसकेका छन् ।नेपाली कांग्रेसको संयोजन र व्यवस्थापनमा तीनकुनेस्थित एक ब्याक्वेटमा प्रशिक्षण कार्यक्रम जारी छ । प्रशिक्षणमा राष्ट्रियसभा र प्रतिनिधिसभाका सांसदलाई बोलाइएको छ ।
कार्यक्रममा गठबन्धनमा रहेका कांग्रेस, नेकपा माओवादी केन्द्र, जसपा, नेकपा एस, जनमत पार्टी, लोसपा, नागरकि उन्मुक्ति र राष्ट्रिय जनमोर्चाका शीर्ष नेताले सम्बोधन गर्दैछन । माघ २५ गते हुने राष्ट्रपति निर्वाचनमा आठदलीय गठबन्धनको तर्फबाट नेपाली कांग्रेसका वरिष्ठ नेता रामचन्द्र पौडेल उम्मेदवार छन् । पौडेलविरुद्ध एमालेले उपाध्यक्ष सुवास नेम्वाङलाई खडा गरेको छ ।
