२० फागुन, एजेन्सी ।
नेपालमा केही गर्न नसक्ने स्थिति भएपछि आफ्नो र परिवारको दैनिकी सहज बनाउन हजारौँको संख्यामा युवा जमात खाडी वा अन्य मुलुक जाने क्रम अहिले पनि उस्तै छ । रहरले नभई बाध्यताले बाँधिएका युवाहरुलाई राम्रो आयआर्जनको प्रलोभन देखाएर विदेश लगि वा विदेश लाने बहानामा ठूलो रकम ठगी गर्ने कम्पनी वा दलालहरुको गिरोह अझै सक्रिय नै छन् ।
केही दिन अघि मात्रै पनि ओमानको मस्कटमा रहेको नेपाली दूतावासको छाप र त्यहाँका पदाधिकारीको हस्ताक्षर नै दूरुपयोग गरेर नक्कली मागपत्र (डिमाण्ड लेटर) बनाएर ठगी गर्ने गिरोह सक्रिय भएको खुलासा भएको थियो ।
दूतावासका अनुसार नक्कली डिमाण्ड कागजात प्रमाणीकरण गरी नेपालमा रहेका म्यानपावरहरूलाई पठाएर त्यो गिरोहले झुक्क्याएर आर्थिक ठगी गर्ने पाइएको हो । यस्ता ठगीहरुबाट बच्न र सचेत रहन सरकारले सबैमा पटक पटक आग्रह गर्दै आईरहेको छ ।
यसैविच, सरकारसँग अनुमति नै नलिई हेभी ड्राइभरको काममा साउदी पठाउने भन्दै एसियापावर रिक्रुुटमेन्ट सोलुसन प्रा.लिले दुई सय जनाभन्दा बढीसँग अन्तर्वार्ता लिइरहेको पाइएको छ । वैदेशिक रोजगार विभागका अनुसार एसियापावर रिक्रुुटमेन्ट सोलुसन प्रालिले विभागसँग पूर्व स्वीकृति नै नलिई हेभी ड्राइभर लगायतका विभिन्न पदमा साउदीको अर्चीरोडोन कम्पनीमा पठाउने भन्दै अन्तर्वार्ता लिइरहेको पाइएको हो ।
विभागबाट खटिएको टोलीले अनुगमनको क्रममा म्यानपावरले दुई सयको सङ्ख्यामा अन्तर्वार्ता भइरहेको पाएको हो । अनुगमनको क्रममा यो काममा पठाउन कुनै स्वीकृति नै नलिएको पाइएपछि विभागले अन्तर्वार्ता रोकी १९ वटा राहदानी बरामद गरेको छ । म्यानपावरले कुन आधारमा के कसरी अन्तर्वार्ता गरेको हो भन्ने सन्दर्भमा थप अनुसन्धान भइरहेको विभागले जनाएको छ ।
