Nepal Times
Nepal Times
3
Shares

के नेपाल प्रहरीले आज पहिलो महिला प्रमुख पाउला ?

के नेपाल प्रहरीले आज पहिलो महिला प्रमुख पाउला ?

१० चैत, काठमाण्डौ ।
नेपाल प्रहरीमा आज (शुक्रबार) नयाँ महानिरीक्षक (आईजी) नियुक्त हुँदैछन्। हालका महानिरीक्षक धीरज प्रताप सिंह ३० वर्ष सेवा अवधि पूरा गरेर शुक्रबारदेखि नै अनिवार्य अवकाशमा जाँदैछन्। शुक्रबार बस्ने मन्त्रिपरिषद्को बैठकले प्रहरीको आईजी नियुक्त गर्ने जनाइएको छ।

बिहीबार बस्ने मन्त्रिपरिषद्को नियमित बैठक आईजी नियुक्तिको निर्णय गर्नका लागि शुक्रबारलाई सारिएको हो। मन्त्रिपरिषद्को बैठक शुक्रबार अपराह्न ४ बजे बस्ने गरी तय भएको प्रधानमन्त्री तथा मन्त्रिपरिषद् कार्यालय स्रोतले जानकारी दिएको छ।

हालका आईजी धीरजप्रताप सिंहसँगै उनका ब्याची एआईजीहरु सहकुल थापा, दिवेश लोहनी, उत्तमराज सुवेदी ३० वर्षे सेवा अवधिका कारण चैत १० गतेदेखि अनिवार्य अवकाशमा जानेछन्। प्रहरीको नयाँ महानिरीक्षकका लागि ५ जना अतिरिक्त महानिरीक्षक (एआईजी)हरु प्रतिस्पर्धी छन्।

केही दिन अगाडि मात्रै एआईजीमा बढुवा भएका बसन्त कुँवर, टेकप्रसाद राई, दीपक थापा, श्यामलाल ज्ञवाली र किरण बज्राचार्यमध्येबाट एकजना नेपाल प्रहरीको ३० औं आईजीका लागि बढुवा हुनेछन्। आईजीको प्रतिस्पर्धीमा रहेका एआईजीहरुले २ दिन अगाडि (बुधबार) मात्रै एआईजी पदको दर्ज्यानी चिह्न (फुली) लगाएका थिए।

नेपाल प्रहरीको इतिहासमै पहिलो पटक महिला प्रहरी अधिकृत किरण बज्राचार्य आईजीको प्रतिस्पर्धामा छिन्। यसअघिसम्म नेपाल प्रहरीले आईजीको प्रतिस्पर्धी महिलासमेत पाएको थिएन। काम गर्नसक्ने सक्षम, सङ्गठनलाई कमाण्ड गर्नसक्ने, नेतृत्व दिनसक्ने लगायतलाई आधार मानेर नेपाल सरकारले आइजीपी बनाउनसक्ने विद्यमान अवस्था रहेको पूर्वप्रहरी अधिकारी बताउँछन् ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.